«Тускул» түөлбэҕэ 30 ыал тэлгэһэтэ ууга барда

Ууну оботторор помпа күнүстэри-түүннэри үлэлиир. Ол эрэн, бу үлүгэр элбэх ууну кыра тиэхиньикэ күүһэ кыайбата биллэр. Помпа ордук элбэх уу киирбит тиэргэннэрин аттыгар үлэлиир. Олор истэригэр Анна Иванова тэлгэһэтэ баар. Чечня сэриитин бэтэрээнин огдообото икки оҕотун кытта билиҥҥитэ сатаан олбуоруттан да тахсыбат.

Анна Иванова, "Тускул" дьоҕус түөлбэ олохтооҕо: "Билигин дьиэбититтэн улахан массыынанан эрэ тахсабыт. Холобур, бэйэм кыра массыыналаахпын, ону бырааппын ыҥырабын. Оччоҕо кини таһаарар. Аны бараары сылдьар. Ол иһин олбуору көтүрэн сылдьар сир оҥоробут дуу диэн толкуйдуубут. Тоҕо диэтэр оҕолор уһуйааҥҥа, оскуолаҕа, оттон бэйэм үлэбэр барыахпытын наада".

Анна Ивановна дьиэтин иннигэр  кумах куттаран, тэлгэһэтин аҥаара ууга барбыт. Дьиэни ылбатах эрээри, цептигэ бүтүннүү ууга сытар.

Оттон бу элбэх оҕолоох Григорьевтар эдэр ыал тэлгэһэлэрэ бүтүннүү ууга баран  оҕолор верандаҕа оонньуурга, сынньанарга күһэллэллэр. Дьиэ кирилиэһиттэн тутатына ууга түһэллэр. Бэйэ күүһүнэн эмиэ хаптаһынынан араастаан муоста оҥорбуттар. Аны туран тэлгэһэҕэ киирэр-тахсар ааннара эмиэ бүтүннүү ууга турар буолан, гараж курдат тахсан күрүөлэрин алдьатан аан оҥосто сылдьаллар.

Ирина Григорьева, "Тускул" дьоҕус түөлбэ олохтооҕо: "Саамай кыра оҕобут биир ыйдаах. Киниэхэ суолбут суох буолан быраас да кэлбэтэ. Оҕолор таһырдьа оонньуулларыгар күүлэҕэ сылдьаллар. Олбуорбут киирии аана бүтүннүү ууга сытар буолан гарааһынан сылдьарга күһэллэбит. Туалеппыт эмиэ ууга турар".

"Тускул" дьоҕус түөлбэҕэ үгүс элбэх оҕолоох ыал, аҕам саастаахтар олороллор. Билигин манна 30-ча тиэргэҥҥэ уу киирэн турар. Дьиҥэр бу түөлбэ Дьокуускай куорат Автодорожнай уокуругар киирэр. Олохтоохтор управаҕа эрийэн, суруйан сайаапка түһэрбиттэр. Ол эрэн, билиҥҥитэ управа помпа эрэ уларсан көмөлөспүт.

Станислав Степанов, "Тускул" дьоҕус түөлбэ олохтооҕо: "Ыксаллаах быһыы-майгы министиэристибэтигэр эрийэ сылдьыбыппыт. Ону киһи олоҕор куттал суох, тугунан да көмөлөһөр кыахтара суоҕун эппиттэрэ.Ол иһин олохтоохтор бэйэбит күүспүтүнэн уу бырахтара сылдьабыт. Уаханнык кыайбат. Уу барар сирин оҥоруохха наада".

Тустаах түөлбэ сыллата бу кыһалҕаны көрсөр. Ааспыт сылтан манна суол оҥорон саҕалаабыттар. Ол эрэн уу барар харыытын оҥорботохтор, онон быйыл өссө элбэх уу кэлбит. Олохтоохтор билиҥҥитэ бары туһааннаах биэдэмистибэҕэ сурук суруйаллар, бу күннэргэ мунньах буолуо диэн эрэннэрбиттэр. Ол эрэн, сыллата хатыланар кыһалҕа хаһан быһаарыллара биллибэт.