Өрүһүнэн уоран туорааччылары коптерынан нүөмэрдэрин түһэрэллэр

Күөх хонууга өрүскэ киириигэ халыҥ уочарат. Төһө да муус суола сабыллыбытын үрдүнэн кэһээччилэр син биир бааллар. Күөх хонуунан итиэннэ 203 дьоҕус түөлбэнэн биһиги устар бөлөх турдахпытына аҥаардас хас да массыына айаннаата. Оннооҕор улахан массыыналар кытта сылдьаллар.

Оттон Даркылаахха үгүс массыына ыраахтан ГИМС, ГИБДД инспиэктэрдэрэ туралларын көрөн уруулларын тиэрэ тутан,  өрүстэн ханан өссө тахсар суол баарын көрдүүллэр. Маныаха сорохтор эбэ ортотугар туран хонтуруоллуур сулууспалар баралларын күүтэллэр. Ол эрэн манна кинилэри күүппэтэх өттүттэн туталлар.

"Туһааннаах биэдэмистибэлэр коптер көтүтэн өрүскэ балаһыанньаны кытылтан кэтии олороллор. Ол курдук камера кэһээччилэр массыыналарын нүөмэрин устан тутатына ГИБДД-га тиийэр", - Ирена Осипова, корреспондент.

Биһиги рейдэлии сылдьар кэммитигэр сабыылаах өрүс суолунан айаннаан иһэр массыынаны квадрокоптерынан көрдүлэр. Уонна тимир көлө номерын икки өттүттэн хаартыскаҕа түһэрдилэр.

Даҕатан эттэхэ буруйдаахтары тутарга бу маннык ньыманы алтынньы ыйтан туһаналлар. Кыһыҥҥы өрүс суола арыллыан иннинэ кэһээччилэри туппуттара, онон ол кэмтэн көдьүүстээҕин көрдөрбүтэ.

Дьулустаан Фёдоров, Дьокуускайдааҕы ыксаллаах быһыы-майгы салалтатын пилота суох көтөр ааллар сүрүн исписэлииһэ: "Ааспыт сылга суол сабыллыбытыгар туттубуппут. Хас да массыынаны туппуппут. Коптербыт көтөр ыыра киэҥ, 1,5-2 киэлэмиэтир курдук".

Оттон кэһээччилэргэ билигин ыстараап кытаатан турар. Сирэйинэн көрөн кээмэйэ араас буолар. 

Захар Никонов, Дьокуускайдааҕы административнай хамыыһыйа сүрүн исписэлииһэ: "Биирдиилээн дьоҥҥо ыстараап кээмэйэ 3-5 тыһ. солк. тиийэ. Оттон дуоһунастаах сирэйдэргэ 20-50 тыһ. солк. диэри. Маны сэргэ юридическэй сирэйдэргэ 100 тыһ. солк. саҕалаан 1 мөл. солк. диэри халбаҥныыр".

Ол эрэн сорох суоппардары ыстараап кээмэйэ да тохтоппот. Бу ааспыт өрөбүллэргэ номнуо массыына ууга түспүт түбэлтэтэ бэлиэтэннэ. Дьолго, бары быыһаммыттар. Ол эрэн, маннык дьалаҕай сыһыан аныгыскыга алдьархайга тиэрдиэн сөп. Онон хас биирдии суоппар бэйэтин олоҕор эрэ буолбакка, дьон олоҕор эмиэ эппиэтинэһи сүгэрин умнуо суохтаах.