Дьокуускайга Гаврил Чиряевка пааматынньык туруо

Саха чулуу уолун Гавриил Чиряев аатын үйэтитиигэ дьоһун хардыы. Бу күннэргэ төрөөбүт Чочу нэһилиэгэр кини аатынан түмэли саҥардан үөрүүлээх быһыыга-майгыга арыйдылар. 30 сыл аннараа өттүгэр төрүттэммит түмэл саҥа тыыннанан, Гавриил Чиряев туһунан архыып докумуоннара, матырыйааллар эбилиннилэр. Маны тэҥэ бу күн кини туһунан кинигэ сүрэхтэннэ.

Наталья Малышева, Г.И. Чиряев туһунан кинигэ ааптара, СӨ национальнай архыыбын дириэктэрин солбуйааччыта: "Биһиги Национальнай архыып уонна Национальнай библиотека буолан холбоон кинигэ таһаардыбыт. “Выдающиеся люди республики” диэн серияҕа. Тэрээһин чэрчитинэн ол кинигэ бүгүн сүрэхтэннэ. Национальнай архыыпка Гаврил Иосифович тус олоҕун фондата харалла сытар".

Оттон сүрүн тэрээһин Бүлүү улууһун киинигэр ыытылынна. Манна киниэхэ анаммыт быыстапка үлэлээтэ, театральнай дьүһүйүү буолла.  Киэҥ ыҥырыылаах мунньахха Ил Дархан, бырабыытылыстыба чилиэттэрэ, улуус бочуоттаах олохтоохторо, Гавриил Чиряев сыдьааннара, үүнэн эрэр көлүөнэ мустан кини аатын чиэстээтилэр.

Виктор Платонов, Бүлүү улууһун бочуоттаах олохтооҕо: "Гаврил Иосифович Чиряев аатын ааттатарга өссө улахан үлэ барыан наада. Тоҕо диэтэххэ бу биһиги, бүлүүлэр, Гаврил Чиряевпыт аата улаханнык ааттаммакка сылдьыбыт. Кини өрөспүүбүлүкэни 17 сыл салайбыт улуу киһи буолар".

Кырдьык да, Гавриил Иосифович Чиряев аатын үйэтитии кэнники сылларга күүскэ барда. Манна төһүү күүс, биллэн турар, Ил Дархан, бырабыытылыстыба өйөбүлэ, үлэтэ. Айсен Николаев Бүлүү улууһун олохтоохторуттан киирбит этиилэри истэн,  Гавриил Чиряевка уонна Степан Аржаковка аналлаах судаарыстыбаннас түмэлин оҥорорго бырабыытылыстыбаҕа сорудах биэрдэ. Уонна пааматынньык тутуутугар

Айсен Николаев, СӨ Ил Дархана: "Үбүлүөй       да кэмигэр миэхэ элбэх киһи тахса сырытта. Ол да иннинэ суруйаллар этэ. Бу Дьокуускай куоракка биһиги кырдьыктыы улуу киһибитигэр, өрөспүүбүлүкэбитигэр элбэх үтүөнү оҥорбут киһибитигэр Гаврил Иосифовичка пааматынньык туруон сөп этэ диэн. Ону эмиэ өйдөөммүн уонна сөбүлэһэн туран бүгүн сорудах биэрдим. Бырабыыталыстыбаҕа уонна куорат салалтатыгар Гарил Иосифович скверыгар бюст оннугар пааматынньыгы туруорун диэн сорудахтаатым".

Оттон бу сыл бүтүөр диэри Гавриил Чиряевка анаммыт тэрээһиннэр тиһигин быспакка ыытыллыахтара. Онон Саха сирин киэн туттар киһитин көмүс аата өлбөөдүйүө суоҕа, норуотугар оҥорбут үтүөтэ үйэлэргэ сананыа.