Өрүс суола сабыллыан иннинэ анал байыаннай дьайыыга улахан кээмэйдээх көмө барар
«Анал байыаннай дьайыыга суол сабыллыан иннинэ бүтэһик фуралар бараары тураллар. Бу Быыһыыр сулууспа базатыгар тимир көлө тиэйэ сылдьаллар. Манна быыһааччылар уонна волонтердар кыттыыны ыла сылдьаллар. Биһиги бэйэбит эмиэ сэсэй кылааппытын киллэрдибит», - Анастасия Добрянцева, корреспондент.
Сүүһүнэн хоруопкалар, куул, дьааһыктар онтон да атын наадалаах таһаҕас - бу барыта Ийэ дойдубутун көмүскүү сылдьар уолаттарбытыгар тиийиэҕэ. Быыһааччы уолаттар, ис сүрэхтэриттэн көмөлөһө сылдьар волонтердар түргэн-тарҕаннык туттан-хаптан массыынаны толороллор.
"Донбасс" пуонда волонтёра Алексей Егоров ис сүрэҕиттэн манна куруутун көмөлөһөр. Таһаҕас аадырыһыттан саҕалаан, манна миэстэтигэр тиийэ кэлэрин хонтуруоллуур.
Алексей Егоров, "Донбасс" пуонда волонтёра: "Аадырыстаммыт баһыылкаларга туох барыта барар. Буойуттарга анаан чугас дьонноро, биир дойдулаахтара хомуйбут маллара-саллара".
"УАЗ" мааркалаах тимир көлө элээрдээн киирэр, салгыы "Сокол" квадроциклы киллэрэллэр. Манна даҕатан эттэххэ, 2022 сыллаахтан 200 тимир көлө анал байыаннай дьайыыга тиийдэ. Маныаха олохтоох оҥорон таһаарааччылар "ЯКТ-Сокол", "Тимир-АТ" таҥан таһаарбыт квадроцикллара уонна электроэндуролара уопсайа 550 ахсаанынан тиийдилэр.
Андрей Максимов, СӨ быыһыыр сулууспатын салайааччытын солбуйааччы: "28 туонна гуманитарнай көмө барбыта бу сылга. Аныгыс нэдиэлэҕэ өссө 3 массыына барыа".
Санатар эбит буоллахха, муус устар 15 күнүгэр кыһыҥҥы өрүс суола сабыллар. Онон билигин бу тиэллибит тимир көлө тутатына айаҥҥа турунуо. Этэҥҥэ айаннаатаҕына 2 нэдиэлэнэн гуманитарнай таһаҕастаах массыына миэстэтигэр тиийиэҕэ.
Дмитрий Лепчиков, СӨ гражданскай көмүскэл дьыалаларыгар уонна нэһилиэнньэ олоҕор-дьһаҕар куттал суох буолуутун хааччыйыыга миниистир: "Биһиги байыастарбытыгар сүүһүнэн туонна араас гуманитарнай көмө, ол иһигэр пилота суох көтөр ааллар. Этиэм этэ, бу үлэ салгыы барар диэн".
Маныаха Улуу Кыайыы 80 сыллаах үбүлүөйүн чэрчитинэн олохтоох оҥорон таһаарааччыллар бородууксуйаларыттан бэлэхтэр ыытылла тураллар. Кыайыы күнүгэр, ыам ыйын 9 күнүгэр 6000 бэлэх байыастарга тиийиэҕэ.