Дьокуускайга нэһилиэнньэҕэ анаммыт доруобуйа дьаарбаҥката ыытыллар

Киин куорат олохтооҕо Ирина Кирова доруобуйаҕа анаммыт быыстапка-дьаарбаҥка буоларын истээт, кэлэн исписэлиистэргэ көрдөрө санаммыт. Улахан уочараты ааспакка быраастан тута консультация ылар бэрт табыгастаах диэн этэр. 

Ирина Кирова, Дьокуускай олохтооҕо: "Балыыһаҕа сылдьар бириэмэ да суох буолар, ону ааһан барыта суруйуунан, онон маннык кэлэн барытын биир сиргэ көрөллөрө олус үчүгэй". 

Медицинскэй тэрилтэлэр, балыыһалар эрэгийиэннээҕи сыллата ыытыллар быыстапкаларыгар уонунан араас тэрилтэ кытынна. Манна доруобуйаны бөҕөргөтүүгэ, ыарыылары эмтэһиҥҥэ туһуламмыт табаар, бородууксуйа өҥө оҥорооччулар муһуннулар. СПИД-киинтэн кэлэн вич, онтон да атын куттааллаах инфекционай ыарыыларга босхо түргэнник оҥоһуллар экспресс-анализ туталлар.

Дмитрий Донской, СӨ СПИД-киинин эпидемиологическай салаатын сэбиэдиссэйэ: "Манна 5 инфекцияҕа – гепатит В,С, туберкулез, ВИЧ, сифилис кэлэн босхо туттарыаххытын сөп. Дьон сырыыта көхтөөх. Номнуо 50 тахса киһи туттарда". 

Кэлбит дьон нарколог, дерматолог  офтальмолог быраастарга көрдөрөн сүбэ ылар кыахтанна. Саамай уһун уочарат харах балыыһатын быраастарыгар тардылынна. Манна тута хараҕын туругун көрөн, дабылыанньатын быһааран быраас рекомендация аныыр.

Светлана Иванова, Сунтаар улууһун олохтооҕо: "Ыраах Сунтаар улууһуттан кэлэ сылдьабын. Маннык тэрийбиттэрэ олус үчүгэй. Барыта босхо". 

Манна медицинскэй реабилитация кииниттэн кэлэн эмиэ бэйэлэрин өҥөлөрүн билиһиннэрэллэр. Аатырбыт "Абалаах" санатарий эмтээх бадараанын аҕалан көрдөрөр. Санаторий быйыл тэриллибитэ 90 сыллаах үбүлүөйэ, сылга тыһыычаттан тахса киһи кэлэн эмтэниини ааһар.  

Сардаана Егорова, реабилитолог быраас: "Сүһүөх, сис ыарыыларын эмтиибит. Булгуччулаах медицинскэй страховканан биһиэхэ босхо эмтэниллэр. Курс икки нэдиэлэ устата салҕанар".  

Оттон Дьокуускайааҕы медицинэ коллеһын устудьуоннара араас түгэҥҥэ  бастакы көмө хайдах оҥоһуллуохтааҕын билиһиннэрэллэр.

Евгения Варламова, Дьокуускайдааҕы медицинэ коллеһын устудьуона: "Холобур, харбыт киһиэхэ бастакы көмө, хаана барбыт киһиэхэ, илиитэ-атаҕа тостубукка бырааска тиийиэр диэри бастакы  көмөнү оҥоруу туһунан нэһилиэнньэҕэ үөрэтэбит".  

Саха сирин медициснкйэ тэрилтэлэрин тэҥэ, атын регионнар бэрэстэбиитэллэрэ эмиэ бэйэлэрин өҥөлөрүн, табаардарын, араас тэриллэрин билиһиннэрэллэр.Быыстапка-дьарбаҥка бу бээтинсэҕэ диэри "Куруһаала" атыы-эргиэн эрээттэригэр үлэлиэҕэ.