"Тонировка" анал тэрээһин ыытыллар

Оперативнай тэрээһин киин куорат уулуссаларыгар ыытыллар. Бүгүҥҥү риэйдэҕэ сүрүн болҕомто докуомуоҥҥа уонна тимир көлө өстүөкүлэтигэр ууруллар. Тутатына хап-харанан иннин тааһын бүрүйбүт улахан кыамталаах массыына тохтотуллар. Иниспиэктэрдэр  анал оборуудабанньанан таас төһө хараҥатын быһаараллар.

Тонировка быраһыанын быһаарар анал тэрил көмөтүнэн бу тимир көлө, олох даҕаны 70% куоһарара быһаарылынна. Онон иниспиэктэрдэр суоппарга пленканы уһуларга ыйдылар.  Маныаха административнай боротокуол толордулар. Пленка олоччу уһуллубутун бэрэбиэркэлээтилэр.

Фёдор Александров, Дьокуускай куорат суолга-иискэ куттал суох буолуутун хааччыйар иниспиэксийэ судаарыстыбаннай иниспиэктэрэ: “5-6 сөкүүнэ калиброкаланар. Онтон 100% буоллаҕына массыына түннүгэр тутан бэрэбиэркэлиибит. Оччоҕо сырдыгы аһарыытын көрдөрөр. Аппарат 70 кыраны көрдөрөр буоллаҕына ирдэбил быһыытынан ааспыт диэн буолар”.

Салгыы тохтотуллубут тимир көлө эмиэ бу "Тоник" диэн ааттаах тэрилинэн бэрэбиэркэлэннэ. 70% куоһаран суоппар тонировочнай плёнкатын уһуларга эмиэ күһэллэр.

Жанна Макарова, Суол-иис судаарыстыбаннай иниспиэксийэтин суолга куттал суох буолуутун хааччыйар салаа иниспиэктэрэ: “Хараҥардар пленка суоппарга көрөрүгэр мэһэйдиир. Ордук хараҥа кэмҥэ сэрэхтээх. Сатыы дьону өйдөөн көрүө суохтарын сөп”.

Оттон манна даҕатан эттэххэ, сыл саҕаланыаҕыттан киин куоракка уопсайа 1243 суоппар тонировочнай пленкатыан административнай боротокуол оҥоһулунна.Оттон маннык оперативнай тэрээһиннэр тиһигин быһыллыбакка ыытыллыахтара.