Дойду бастыҥ саахымаччыттарын түмэр күрэхтэһии аһылынна

50

Саха сиригэр саахымакка Ил Дархан Куубага саҕаланна. Турнир быйыл үһүс төгүлүн ыытыллар. Мындыр өйү, түргэн толкуйу ирдиир көрүҥҥэ барыта 90-ча киһи кыттыыны ылар.

Уус Алдан улууһуттан төрүттээх Евдокия Избекова саахамытанан 1 кылаастан дьарыктанар. Саахымат киһи өйүн сайыннарар, тулуурдаах, дьулуурдаах буоларга үөрэтэр диэн этэр.

Евдокия Избекова, кыттааччы: «Сыл аайы эбиллэн иһэн. Холобур, быйыл рапид түргэн көрүҥэр 80-тан тахса кыттааччы баар».

Саахымат Саха сиригэр кэлиҥҥи кэмнэ сайдан иһэр. Ол курдук утумнаан дьарыктанааччылар сылтан сыл аайы элбээн иһэллэр, маны таһынан ордук сөбүлээн оҕолор эмиэ дьарыктанар буоллулар диэн тэрийээччилэр этэллэр.

Мичил Лазарев, күрэх тэрийээччитэ: «Кэлиилэр этэллэринэн, Саха сирин саахымата сайдыбыт аҕай диэн. 9 гроссмейстер кэллэ. Олору кытары тэҥҥэ киирсэ сылдьабыт».

Кырдьык да быйыл кыттааччыта элбэх, Арассыыйа 13 регионуттан күрэхтэһэ кэлбиттэр. Быйыл туринир үс түһүмэҕинэн арахсан ыытыллар.

Владимир Егоров, СӨ саахымат федерациятын бэрэсидьиэнэ: «Ил Дархан Куубагын үрдүк таһымҥа таһаардыбыт. Билигин 3 Арассыыйа таһымнаах күрэхтэһиини ыыта сылдьабыт. Суолтата диэн, биһиги эдэр көлүөнэбитин маннык күрэхтэһиигэ гроссмейстердары кытта оонньотобут уонна кинилэри кытта бэйэлэрин холонон сатабыллара үрдүүр».

Ил Дархан Куубага муус устар 11 күнүгэр диэри ыытыллыаҕа. Күрэхтэһии кэмигэр гроссмейтердары кытта көрсүһүү, аһаҕас кэпсэтиилэр, семинардар, маастар-кылаастар ыытылыахтара.