ХИФУ устудьуоннарыгар аналлаах доруобуйа бэстибээлэ ыытылынна

62

Сүрүн быраастар бары биир сиргэ. Онон устудьуоннар үөрэх быыһыгар доруобуйаларын туругун көрдөрөр кыахтаннылар. Хаан баттааһынын кээмэйдииртэн саҕалаан невролог, лор, пульмонолог, эндокринолог курдук исписэлиистэргэ тиийэ бааллар. бу бэстибээли 3 сылын  "Волонтеры-медики" хамсааһын тэрийэн ыытар.

Евгений Амбросьев, "Волонтёры-медики" хамсааһын Саха сиринээҕи салаатын сүрүннээччитэ: «Манна туох баар балыыһалартан быраастары хомуйан ХИФУ студеннарыгар, үлэһиттэригэр диспансеризация курдук оҥоробут. Билигин 1000-тан тахса киһини хомуйуохпутун баҕарабыт».

Хаан састаабыгар сахар көрдөрүүтүн бэрэбиэркэлэтээри уһун уочарат. Бу анализ түмүгэ киһи доруобуйатын туругун үгүс өрүтүн көрдөрөр. Онон баҕалаах сыллата элбэҕин тэрийээччилэр этэллэр. Волонтер бу тэрээһиҥҥэ кытаары анаан-минээн Үөһээ Бүлүү улууһуттан кэлбит. Кини онно медбратынан үлэлиир.

Виктор Павлов, волонтёр-медик: «Бу бэстибээлгэ оҕолор бэйэлэрин көрдөрөллөр эбит, маннык элбэх киһи кэлиэ диэн кэтэспэтэҕим».

Маны тэҥэ устудьуоннар эттэрин-сииннэрин састаабын үлүһүйэн туран быһааттардылар. Дерматологка сирэйдэрин туругун көрдөрдүлэр. ЛОР бырааска эмиэ уочарат халыҥ. Үрдүттэн үөрэнэр сирдэригэр кэлбит быраастары мүччү туппакка бары исписэлиискэ көрдөрүннүлэр.

Артём Куличкин, ХИФУ устудьуона: «Дабылыанньа мээрэйдэттим уонна неврологка сырыттым. Сүбэ биэрдилэр».

Невролог бырааска устудьуоннар эмиэ үгүстүк сырыттылар. ХИФУ клиникатын быраастара көрөллөр. Ордук төбөлөрө, систэрэ ыалдьан, утуйбат буолан бу исписэлиискэ сылдьалларын үллэстэллэр. Невролог чинчийии кэннэ салгыы  эмтэнэргэ аныыр.   

Сардаана Кривых, ХИФУ клиникатын невролог бырааһа: «Показания баар буоллаҕына биһиэхэ клиникаҕа ыҥырабыт».

Исписэлиистэр сааскы быыһык кэмҥэ хаан баттааһыныгар болҕомтону уурарага сүбэлээтилэр итиэннэ хайаан да сибиэһэй салгыҥҥа хаамыы баар буолуохтааҕын ыйдар. Номнуо хаһыс да сылын ыытыллар бэстибээли устудьуоннар күүтэллэр. Онон сыалай кууруһунан көрдөрүнэ кэлэллэр.

Пётр Слепцов, ХИФУ устудьуона: «Группанан ыыппыттара көрдөрүн диэн. ЛОРга сырыттым».

"Волонтеры-медики" түмсүү тэрийэр бэстибээлэ эдэр эрдэхтэн доруобуйаҕа эппиэтинэстээх сыһыаны иҥэрии. Маныаха сыллата көрдөрүнээччи ахсаана элбиирэ. Ыытыллар тэрээһин күттүөннээҕин көрдөрөр.