Дьокуускайга "Лыжня России" хайыһарга маассабай күрэхтэһии элбэх дьону түмтэ

79-с хаарын уулларан эрэр Мэҥэ Хаҥалас улууһуттан төрүттээх Афанасий Илларионов хайыһар күрэхтэһиитигэр сыллата көтүппэккэ кыттар. Бу да сырыыга ох курдук оҥостон 1952 сыллартан үөһээ саастаахтар бөлөхтөрүгэр киирэн сүүрдэ. Афанасий Петрович оҕо эрдэҕиттэн- 3 кылаастан ыла күн бүгүнүгэр диэри биир да сыл өрөөбөккө хайыһарынан дайар.

Афанасий Илларионов, күрэхтэһии кыттыылааҕа: «Мин санаабар үчүгэй спорт көрүҥэ. Киһи таһырдьа сылдьар, айылҕаны кытта алтыһар уонна мэлдьи дьарыктанар буоллахха киһи доруобуйатыгар туһалаах».

Бу Күөх Хонууга сыллата хайыһар маассабай күрэхтэһиитигэр элбэх дьон мустар. Быйыл кыттааччылыын, көрөөччүлүүн тыһыынча кэриҥэ киһи кэллэ. 500 миэтэрэттэн 2 км дистанцияҕа диэри уопсайа 10 сүүрүү буолла. Оскуола оҕолоруттан кырдьаҕастарга тиийэ саастарынан бөлөххө арахсан хайыһарга турдулар.

Эдуард Старостин, Дьокуускай куораттааҕы спорт уонна физкультура салалтатын салайааччытын солбуйааччы: «Хайыһарга интириэс улахан. Сыла аайы дьон элбиир. Өрөспүүбүлүкэ үрдүнэн 5 тыһ. кэриҥэ киһини хабыахтаахпыт».

Быйыл күрэхтэһиигэ дьиэ кэргэнинэн сүүрүүнү киллэрдилэр. Уонунан ыал-ийэ, аҕа оҕолорун кытта күрэхтэстилэр. Винокуровтар дьиэ кэргэн 5 сылын бу күрэхтэһиигэ кытталлар. Быйыл сиэннэрин кытта кэлбиттэр. 

Клара Винокурова, күрэхтэһии кыттыылааҕа: «Сиэммитин кытта кэллибит. Кини хайыһарга дьарыктанар».

Лилиана Винокурова, күрэхтэһии кыттыылааҕа: «Үчүгэйдик хайыһардыыбын, ордук конектаан».

Анатолий Винокуров, күрэхтэһии кыттыылааҕа: «Хайыһар диэн сибиэһэй салгын, саха киһитигэр саамай чугас көрүҥ».

Винокуровтар сиэннэрин кытта бэйэлэрин бөлөхтөрүгэр кыайыыны ситистэлэр. Оттон бэтэрээннэр алта бөлөххө арахсан сүүрдүлэр. Уус Алдан улууһуттан анаан-минээн күрэхтэһэ кэлбит Раиса Троева бэйэтэ физкультура учуутала, хайыһары кытта эн-мин дэһиспитэ үйэ аҥарыттан номнуо ордубут.

Раиса Троева, Уус Алдан улууһун олохтооҕо, күрэхтэһии кыттыылааҕа: «Киһи бөҕөтө кэлбит. Ыаллар оҕолорун кытта сүүрбүттэрин кэрэхсии көрдүм».

Күрэхтээччилэр ортолоругар спортсменнар даҕаны, көннөрү хайыһарынан үлүһүйээччилэр да бааллар. Сыллата хайыһарынан дьарыктаначчы ахсаана элбии турар.