Тыйаатыр үлэтин иһиттэн

Испиктээкил саҕаланара үс чаас хаалла. Бэлэмнэнии номнуо саҕаланна. Артыыстар "Белоснежка уонна семь гномов" оҕо испэктээкилин толороору оҥостоллор. Артыыһы таһынан испиктээкил өссө биир тутаах үлэһитэ - гример. Кинитэ суох сирэй-харах оҥоһуллубат.

Ваира Аргунова, гримёр-худуоһунньук: "Хас биирдии бэлэмнэнии, репетиция аайы оҥорон көрөбүт. Онно уокка сөп түбэрһэрин, режиссер сөбүлүүрүн көрөҕүн, көстүүмүгэр барсар буолуохтаах".

Онтон костюмернайга туспа үлэ-хамнас. Манна артыыстар кэтэр таҥастарын наардааһын үлэтэ бара турар. 20-тэн тахса ыстаастаах Мария Ларьева ханнык да артыыс таҥаһын хаһан да бутуйбат.

Мария Ларьева, костюмер: "Хас биирдии көстүүм аайы ааттара сурулла сылдьар. Ону кэнсиэр буоларыгар испииһэгинэн таһаартаан биэрэбит".

Бу курдук тыйаатыр үлэһиттэрэ тыйаатыр күнүн үлэ үөһүгэр көрсөллөр. Күн бүгүн өрөспүүбүлүкэ биир соҕотох Опера уонна балет тыйаатарыгар 400 кэриҥэ киһи үлэлиир, айа-тута сылдьар.

Владислав Лёвочкин, Д.К. Сивцев-Суорун Омоллоон аатынан Опера уонна балет тыйаатарын дириэктэрэ: "Биһиэхэ декорацияны оҥорор, көстүүмнэри тигэр  туһунан мастарыскыай баар. Ону таһынан сцена кэтэҕэр көстүбэт үлэһит олус элбэх. Холобур, режиссер, гример, сыананы таҥааччылар, уоту турорааччылар, тыаһы-ууһу оҥорооччулар уо.д.а.  Онон сценаҕа  ускуустуба дьиктитэ туруутугар кинилэр оруоллара олус улахан".

Тыйаатыр көстүбэт эйгэтэ - бэйэтэ туспа тыыннаах. Үлэһиттэр испиктээкили көрөөччүгэ таһаарыахтарын иннинэ хас да ый бэлэмнэнэллэр.

Катерина Корякина, СӨ үтүөлээх артыыһа: "Биһиги үлэбит түмүгүн сыаналааччылар – көрөөччүлэр. Онуоха биһиги сүрдээх элбэх үлэни, сыраны киллэрэбит".

Елена Посельская тыйаатырга үлэлээбитэ уон сэттис сыла. Испиктээкилгэ сүрүн оруолу оонньуур буолан сарсыардаттан бэлэмнэнэ олорор. Сыанаҕа тахсыан иннинэ куруук долгуйарын  этэр. 

Елена Посельская, Д.К. Сивцев-Суорун Омоллоон аатынан Опера уонна балет тыйаатарын солиһа: "Долгутуулаах, эппиэтинэстээх. Ол эрэн сценаҕа таҕыстаххына барыта сүтэн хаалар. Көрөөччүгэ эрэ анаан дууһаҕын ууран туран үҥкүүлүүгүн".

Хас биирди испиктээкил бу барыта хамаанда сыралаах үлэтин түмүгэ. Билигин тыйаатыр үлэһиттэрэ аныгыскы ыйга туруохтаах саҥа испиктээкилгэ күүстээхтик бэлэмнэнэ сылдьаллар.