Дьокуускайга ЖКХ өҥөтүн туһаныы бары тэрилтэлэрэ кыттыгастаах аахсыйа тэрилиннэ

Бары исписэлиистэр биир сиргэ. Коммунальнай өҥө иһин төлөбүргэ ыйытыылаах дьоҥҥо табыгастаах тэрээһин. Дьокуускай олохтооҕо Федора Шишигина уу, уот иһин төлөбүрүн чопчуласта итини сэргэ төлөпүөн сыһыарыытынан ыйдааҕы төлөбүрүн оҥорууну быһаарыста. 

Федора Шишигина, Дьокуускай олохтооҕо: «ЖКХ төлөбүрүн сыһыарыы нөҥүө төлүүбүн. Балтыбын эмиэ онон төлөттөрөөрүбүн, Единый лицевой счет диэн баар, ону билээрибин Теплосети диэҥҥэ тиийэн ыйыттым».

Ити курдук коммунальнай өҥө иһин төлөбүргэ ыйытылыылаахтар быыстала суох кэлэ тураллар. Дьон ордук иэһи хайдах гына табыгастаахтык төннөрүү, чэпчэтиинэн туһаныы туһунан ыйыталаһаллар. Тэрээһин  баар  чэпчэтиилэри сырдатар соруктаах.

Зоя Бессонова, "ЯПК "Платежи" тэрилтэ олох-дьаһах коммунальнай өҥө иһин төлөбүрү учуоттуур салаатын салайааччы: «Льгота уонна субсидия көрүллэр. Ону өҥөнү туттааччылар билбэккэ сылдьаллара буолуо диэн. Ол иһин манна кэлэн билсиэххэ сөп».

Ааспыт сыл түмүгүнэн 194 анал байыаннай дьайыы кыттыылааҕын дьиэ кэргэнэ туһаммыт. Итини сэргэ 4600 элбэх оҕолоох  ыал чэпчэтии оҥотторбуттар.  Элбэх оҕолоохторго чэпчэтиинэн туһаныы усулуобуйата -  3 эбэтэр онтон элбэх оҕолоох дьиэ кэргэттэр,  Чэпчэтии биир эрэ дьиэҕэ көрүллэр, Көмө иэһэ суох дьоҥҥо көрүллэр. Сайаапканы элбэх оҕолоох дьиэ кэргэн биир төрөппүтэ эбэтэр сокуоннай бэрэстэбиитэл биэриэн сөп.

Аахсыйа кэмигэр хапытаалынай өрөмүөн иһин төлөбүргэ үгүс ыйытыы киирдэ. Манна быйылгыттан төлөбүргэ уларыйыы киирдэ итиэннэ испиэһэк чопчуланна.

Саида Петрова, СӨ хапытаалынай өрөмүөн пуондатын дьиэни бас билээччилэри кытта үлэ салаатын салайааччы: «Тарыыппыт уларыйда гаастаах уонна гааһа суох дьиэлэргэ. Сорох дьиэлэр сыыһа учуоттана сылдьаллар эбит, ону барытын хат суоттаан көннөрөн биэрдибит».

Нэһилиэнньэҕэ туһалаах тэрээһин инникитин өссө да былааннаахтык ыытыллыа.