Быйыл Крым уонна Севастополь Арассыыйаҕа холбоспута 11 сыла бэлиэтэнэр

2014 сыллаахха Крым уонна Севастополь олохтоохторо Арассыыйаҕа холбоһоору, бары биир санаанан референдумҥа 97% куоластарын биэрбиттэрэ, төрүт сирдэригэр төннүбүттэрэ.

Георгий Гаврильев, Дьокуускай куорат баһылыгын бастакы солбуйааччыта: «1783 сыллаахха Керченскай полуостров Российскай Империя иһигэр киирбитэ, уонна өр сылларга Арассыыйа сирэ этэ. Сэбиэскэй сойуус эрдэҕинэ эмиэ 1954 сылга дылы РСФСР иһигэр баар этэ. 2014 сыллаахха референдум буолбута уонна Крым нэһилиэнньэтэ 96% тахса куолаһынан Арассыыйа иһигэр киирбитэ. Билигин көрдөххө Крым сайда турар».

Бу күн үгэс быһыытынан Дьокуускай куорат болуоссатыгар бырааһынньыктааҕы кэнсиэр ыытыллынна. Манна олохтоохтор,  уопсастыбаннас, ыччат мустан, көхтөөх кыттыыны ылла.

Крым уонна Севастополь Арассыйаҕа төннүүтэ бу Дойду дьоно түмсүүлээҕин, хорсун санаалааҕын көрдөрөр. Бу бэлиэ күн норуот сомоҕолоһуутун туоһута.

Николай Бугаев, Ем. Ярославскай аатынан Саха түмэлин дириэктэрэ, норуот депутаата: «Бүгүн үөрүүбүт улахан. Уһун сылларга бу күн Крым күнэ буолуоҕа. Крым олохтоохторо сөпкө талан Арассыыйаҕа киирбиттэрэ олус үчүгэй».

Бэлиэ күнү Дойду бары регионнарыгар киэн далааһыннаахтык бэлиэтииллэр. Бырааһынньыктааҕы кэнсиэр, быыстапка, историяны кэпсиир киинэлэри көрдөрдүлэр. Оскуола оҕолоругар аһаҕас кэпсэтиилэри, уруоктара ыыттылар.