"Баһаары сэрэт - АДПИ-ны туруор" аахсыйа ыытыллар

Сарсыардаттан илии тутуурдаах, өттүк харалаах СӨ баһаары утары сулууспатын үлэһиттэрэ Тулагы-Киллэм ытык кырдьаҕаһыгар кэллиллэр. "Баһаары сэрэт - АДПИ-ны" туруор диэн ааттах тустаах биэдэмистибэ ыытар социальнай аахсыйатын чэрчитинэн сэрии оҕото, Тулагы-Киллэм бочуоттаах олохтооҕор Анна Петровна Слепцоваҕа күн бүгүн баһаары сэрэтэр оборуудабанньа туруоҕа.

Саха Өрөспүүбүлүкэтин гражданскай оборонаҕа уонна нэһилиэнньэҕэ куттал суох буолуутун хааччыйар министиэристибэ 27 нүөмэрдээх ыйааҕынан баһаары сэрэтэр үлэ чэрчитинэн күн бүгүн ыйыллыбыт дьиэҕэ 2 устуука АДПИ туруорулунна. Онтон бу тэрил уот тахсыбыт бастакы сөкүүндэлэриттэн биллэрэр соруктаах буолар.

Руслан Босиков, СӨ баһаары утары сулууспатын салайааччыта: «Бу икки ый иһигэр биһиги 200-тэн тахса АДПИ туруордубут. Аахсыйа иһинэн Тулагы нэһилиэгэр ытык кырдьаҕаспытыгар Анна Петровнаҕа туруордубут».

Баһаары сэрэтэр тэриллэр биир хоско, иккиһэ куукуна уонна саала икки ардыгар ыйаннылар. Оттон бүтэһик практика көрдөрөрүнэн АДПИ үгүс дьон олоҕун быыһаан турар.

Анна Слепцова, Тулагы-Киллэм бочуоттаах олохтооҕо: «Мин алдьархай бытааммын. Баһаар буоллаҕына манна хааларбар тиийэбин. Туруорбуттарыгар махтанабын».

Хомойуох иһин, бу сыл саҕаланыаҕыттан номнуо 288 баһаар тахсан, 19 киһи олоҕо уокка былдьанна, 15 киһи араас таһымнаах эчэйиилэри ыллыллар. Онон маннык профилактическай-сэрэтэр тэрээһиннэр бу хайысхаҕа статистиканы кыччаталларыгар туһуланар.

Виктор Колесов, Тулагы-Киллэм 7-с №-дээх баһаарынай чааһын салайааччыта: «Былырыын 100 туруорбуппут Тулагы-Киллэм нэһилиэгэр. Муниципальнай аахсыйанан 85 киирбитэ элбэх оҕолоохторго диэн уонна 35 бэйэбит туруорбуппут».

Билигин аахсыйа тохтоло суох барарыгар, эстафета ыытыллар. Саха Өрөспүүбүлүкэтин баһаары утары сулууспатын салайааччыта салгыы аахсыйаны ыытар.

Манна даҕатан эттэххэ, бу тэрээһин 2021 сыллаахтан ыытыллар. Номнуо бу кэм устата 8000 тыһ тахса ыал хабылынна.