Нэһилиэнньэҕэ куттал суох буолуутун хааччыйар министиэристибэтин бирииһигэр хапсаҕай буолла

Өбүгэ саҕаттан кэлбит, саха омуга сөбүлүүр спорт биир көрүҥэ хапсаҕай. Бу өрөбүллэргэ Дохсун спорт киинигэр 6 төгүлүн ыытыллар СӨ гражданскай оборонатыгар уонна  нэһилиэнньэ олоҕор куттал суох буолуутун хааччыйар министиэристибэ аатыгар улахан күрэх ыытылынна. Сыллата кулун тутар ыйга киин куоракка Өрөспүүбүлүкэ бары муннугуттан баһаарынайадар, быыһааччылар көбүөргэ күөн көрсөллөр.

Ол курдук, мандатнай хамыыһыйаны ааһан, бу күрэххэ үгүс элбэх киһи кыттара биллибитэ. Манна баһаарынайадар, быыһааччылар эрэ буолбакка, идэлээх спортменнар эмиэ кыттыыны ылаллар.

Иннокентий Андросов, СӨ Быыһыыр сулууспатын салайааччы: «Аатырбыт хапсаҕайдьыттарбыт бары бааллар. Күрэхтэһиибит үчүгэйдик бара турар. Биир да мөккүһүү суох. Хапсаҕайдьыттар үөрэллэр-көтөллөр, көрөөччү да баар».

Чахчы, хапсаҕай тыҥааһыннаах киирсиилэрин көрө үгүс дьон-сэргэ спорт уораҕайыгар тоҕуоруспут. Өрөспүүбүлүкэ таһымнаах күрэх биллэн туран, аан бастакынан спортсменнар параадтарынан арыллынна. Манна ыксаллаах быһыы-майгы эйгэтигэр киирэрэ тэрилтэлэр биир күргүөмүнэн таҕыстылар. Өрөспүүбүлүкэ биир аатырбыт, баһаарынай идэлээх хапсаҕайдьыта Тимур Николаев бэйэтин 4 баһаарнай чааһын көмүскүү кэлэ сылдьар.

Тимур Николаев, күрэх кыттааччыта: «Үһүс төгүлбүн кытта сылдьабын. Биирдэ бастыы сылдьыбытым. Сыл аайы күрэхтэһии күүһүрэн иһэр. Кыттааччы элбэх».

Бу күрэххэ киин куоракка эрэ үлэлиир үлэһиттэр буолбакка, улуустартан эмиэ кыттыыны ыла сылдьаллар.Таатта баһарынай сулууспатын үлэһитэ Алексей Трофимов гран-при күрэҕэр ох курдук оҥостон кэлбит.

Алексей Трофимов, күрэх кыттааччыта: «85 киилэҕэ киирсэ сылдьабын. Дьарыгым эмиэ хапсаҕай баар буолан киирсэ сылдьабын».

Быйылгы күрэҕи 21 судьуйа сыаналыыр. Быраабыла хапсаҕай федерациятынан ыытыллар.

Григорий Захаров, күрэх кылаабынай судьуйата: «Күрэхтэһии хаамыыта арыый атын. Былыргылыы быраабыланнан буола турар – иккили хотторуулаах. Ол иһин А, Б диэн бөлөхтөөбөккө, төгүрүччү тусталлар, гынан баран иккитэ хотторбут туораан иһэр».

Сыллата бу күрэх таһыма үрдээн, кыттааччыылар ахсааннара элбээн иһэр. Спорт министиэристибэтин халандаарыгар киирэн, тустаах хапсаҕайга маастар нуорматын толоруохха сөп.