Аатырбыт "Спид Стар" диэн сүүрүк ат туһунан киинэ кулун тутар 27 күнүгэр улахан экрааҥҥа тахсыаҕа

Ипподромҥа тутуллан турар сылгыларга күнүскү дьаарбайыы. Астык көстүүлээх сүүрүк боруодалар көй салгыҥҥа тахсан өссө тупсубукка диэрилэр. Оттон бу турар Айнцер Гут диэн ааттаах ат барыларыттан ураты. Саха сирин бүттүүнэ кэтэһэр "Спид Стар" диэн киинэҕэ уһуллубут.

Билигин уонугар сылдьар сылгы хас да сыл бүөбэйдээбит киһитин тута билэр.  Инники ситиһиилээхтик сүүрэ сылдьан баран, атаҕа эчэйэн тохтообут Айнцер Гуту  продюсер Степан Порядин киинэҕэ устан олоҕун быыһаабыт. Икки сыл Мэҥэ хаҥаласка идэһэҕэ барар дьылҕаланан атыыга турбут. 

Степан Порядин, продюсер: «Талыбыппытын кэмсимэппит, артыыстары кытта наһаа үчүгэйдик үлэлээтэ. Бэйэтэ эдэр игин буолан оруобун түбэстэ. Киинэҕэ оҕолору кытта уонна кыыллары кытта үлэлиир саамай ыарахан. Ону биһиэнэ барыта түбэстэ».

Киинэҕэ Саха сиригэр аатырбыт "Спид Стар" диэн сүүрүк ат туһунан кэпсэнэр. Бу ат өрөспүүбүлүкэ баһылыгын бирииһигэр үс төгүллээх чемпион. Хартыына дьиҥнээх олоххо буолбут түгэннэри сырдатар, сылгы уонна киһи сыһыаннара арылхайдык көстөр.

Оттон "киинэ сулуһа" буолбут Айнцер Гут билигин спорт атын көрүҥэр холонор. Ол курдук агротехнологическай университет ипподромугар оҕолору дьарыктааһыҥҥа.

Татьяна Копылова, АГАТУ ипподромун сэбиэдиссэйэ: «Он у нас спортсмен, подает большие надежды в высшей школе верховой езды и в преодолении препятствий. Учится, очень умный, сообразительный».

Сааһа уона онон ситиһии өссө иннигэр. 3 сылы быһа киинэҕэ уһуллубут буолан дьоҥҥо үөрүйэх. Ипподром үлэһиттэрин барыларын эндэппкээ билэр. Бэйэтин ыраастатарын, тарааттарарын олус диэн астынар.

Аны аҕыйах хонугунан бу сылгы биир саамай биллэр түөрэм туйахтаах буолуо. Спортивнай драма кыайыыга дьулуһууну, дьиннээх доҕордоһууну, дьиҥ тапталы көрдөрөр. Айнцер Гут бу оруолу кыайбытын киинэ устааччылар сыаналыыллар.

Степан Порядин, продюсер: «Бастакы күҥҥэ уолаттары хайдах олорорго үөрэтэн, кантаак олохтоон саҕаламмыта. Ону тэҥэ саахарынан, аһынан албыннаан, үчүгэй аһынан 3 сылы быһа кыстатан, кэнники камераттан куттамат буолбута. Киинэҕэ үчүгэй баҕайы каадырдар бааллар».

Онон "Спид Стар" киинэ ат сүүрдүүтүн таптааччыларга уонна саха кинематографиятыгар чаҕылхай түгэнинэн буолуоҕа.