Күнү-дьылы сылыктааччылар этэллэринэн хаар өссө да үллүктүө

Сүрүн болуоссат хойуу хаартан ыраастанар. Аҕыйах күн иһигэр киин эҥээр халыҥ хаарынан бүрүлүннэ, сааскы салгын билиннэ. Онон коммунальнай хаһаайыстыба үлэһиттэригэр үлэ лаппа элбээтэ.

«Бу күннэргэ хаар хойуутук түһэн олох-дьаһах коммунальнай хаһаайыстыба үлэһиттэригэр түбүктээх кэмнэр үүннүлэр. Ол курдук күннэтэ Дьокуускай суолларыгар 50 тахса анал тиэхиньикэ уонна 60 тахса үлэһит хаары хомуйар», - Ирена Осипова, корреспондент.

Оттон сүрүн уулуссалары эрэ буолбакка, олорор дьиэлэр тиэргэннэрин уонна тэрилтэлэр бэйэ олбуордарын эмиэ хаартан босхолууллар. Афанасий Никаноров чааһынай тэрилтэҕэ дворнигынан үлэлиир. Быйыл сылаас кыһынын итиэннэ хаар аҕыйаҕын бэлиэтиир.

Афанасий Никаноров, чааһынай тэрилтэ дворнига: "Мэрияттан хааргытын ыраастааҥ диэн дьаһал кэлбитэ. Ону биһиги бу кулун тутар ортотугар диэри бүтэриэхтээхпит. Былырыын 11 массыынаны тиэйбиппит, оттон быйыл 5 массыына барда, аны икки хаалла".

Халлаан сылыйыытын кытта суолга халтараан саҕаланар. Онон суоппардар да, сатыы да сылдьааччылар сэрэхтээх буолаллара ирдэнэр. Ол эрэн сорох суоппардары суолга олоххо кутталлаах араас албаһы оҥороллоругар халтараан да тохтоппот. Холобур, бу каадырга көстөрүнэн улахан кыамталаах массыына утары балаһанан айаннаан иһэр уонна атын суол кыттыылаахтарыгар кутталы үөскэтэр. Даҕатан эттэххэ, аҥаардас бу сыл саҕаланыаҕыттан киин куоракка 600 тахса суол быһылаана бэлиэтэммит.

Владилена Охлопкова,  Дьокуускай куорат суолга-иискэ салалтатын сэрэтэр үлэҕэ иниспиэктэрэ: "Холобур, ааспыт нэдиэлэҕэ 67 суол саахала бэлиэтэннэ. Манна түөрдүгэр оҕо кыттыылаах уонна 3 киһи, хомойуох иһин, күн сириттэн күрэммит. Ааспыт икки өрөбүл күннэргэ 12 суоппар итирик туруктаах тимир көлөнү ыыта сылдьаллара биллэн, матырыйааллара суукка барыахтара".

Мантан саас суолга-иискэ халтараан биллэ элбиэҕэ. Күнү-дьылы кэтээн көрөр сулууспа иһитиннэрэринэн бу нэдиэлэ бүтүүтэ Саха сирин үгүс улуустарыгар эмиэ хаардыыра күүтүллэр.

Саргылаана Никитина,  Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта: "Нэдиэлэ бүтүүтэ арҕааттан сис былыттар киирэннэр өрөбүл күннэргэ хаардаах сылаас күннэри аҕалыа".

Оттон нэдиэлэ устата өрөспүүбүлүкэ үрдүнэн улахан сөҥүүтэ суох күн-дьыл туруоҕа. Муҥутаан температура 33 кыраадыска диэри тымныйыа. Онон уларыйа турар халлааҥҥа суолга-иискэ ордук болҕомтолоох буолар ирдэнэр.