Сыырдаахтар сылгы хаһан аһыыр сирэ туруорсаллар

Иван Федоров сылгытын нэһилиэктэн чугас аһатар. Үөрүн аска биллэрбитэ номнуо ый кэриҥэ буолбут. Сыырдаах сирэ-уота арыы сир.  Быйыл күһүнэ уһун, кыһына сылаас буолан сылгы ырыганнаабата. Ол эрэн бу эҥээр кэнники сылларга кэнчээри олох үүммэт буолан аска киллэрии булгуччулаах. 

Иван Федоров, сылгыһыт: "Быйыл дьиибэ баҕайы буолла, кыһын тымныйан иһэн сылыйан хаалла. Онтон аны билигин дьыбарданар. Мин санаабар, саас сылгыга халлаан тугу эрэ оҥороро буолуо. Ол иһин сылгыларбын аһаталыыбын, кэлэ бара сырыттыннар диэммин". 

Сыырдаахха тыа хаһаайыстыбата кэнники сылларга биллэ сайынна. Ол курдук сылгы ахсаана элбиирэ бэлиэтэнэр. Сыспай сиэллээх үгүс өттө кэтэх хаһаайыстыбаҕа тутуллар. Маныаха киин куорат чугаһыгар сылгы хаһан сиир сирэ тиийбэт.

Иван Федоров, сылгыһыт: "Сорохтор саҥа саҕалаан эрэллэр, сорохтор номнуо 4-5 үөрдэннилэр. Онон биһиги сирпитигэр-уоппутугар сылгы охтон-кэхтэн биэриэ суоҕа гынан баран, аҕыйах сылынан иэдэйэрбит буолуо, тоҕо диэтэр сирбит-уоппут кыччаата. Барытын биэртэлээтилэр ити".  

Иван Федоров сылгыларын икки аҥыы араартаан аһаталыыр. Ырыганнаабыттары күрүө иһигэр эбии аһылыкка тутар, оттон туруктара үчүгэйдэр арыыттан кэлэ бара сылдьаллар.

"Үчүгэй төрүөх мэктиэтэ – эбии аһылык. Күн бүгүн Саха сиригэр 172 тыһыынча түөрэм туйахтаах баар. Мантан 40 тыһыынчата номнуо аска киирэн турар". 

Күн бүгүн от саппааһа 48 бырыһыаҥҥа тэҥ. Хотугу улуустарга тиэйиигэ 50 мөл. солк. сууммалаах көмө көрүлүннэ. Саха сиригэр сылгы иитиитин сайыннарыыга туһулаан бу кулун тутарга улахан мунньахтар ыытыллыахтара.

Василий Бессонов, СӨ ТХМ сүөһүнү иитиигэ, племенной үлэҕэ, кэпэрээссийэҕэ уонна бааһынай хамсааһыныгар департаменын салайааччытын эбээһинэһин толорооччу: "Бэтэринээринэй ирдэбиллэргэ, аһылыгар, өртөөбүн боппуруоһугар, племенной үлэни торумнуур кэккэ мунньахтары тэрийиэхпит. Ол түмүгүнэн кулун тутар 21 күнүгэр ылыллыбыт этиилэри түмэммит биир улахан докумуоҥҥа тиһэн таһаарыахтаахпыт". 

Баар кыһалҕалары, инники сайдыы торумун хаһаайыстыбалаахтар Сылгыһыт күнүгэр ырытыһыахтара.