Дьахталлар сийиэстэригэр үгүс сытыы боппуруостар көтөҕүлүннүлэр

Саха сирин дьахталларын бастакы сийиэһэ 1925 сыллаххха ыытыллыбыта. Онно сүүстэн тахса эдэркэээн кыргыттар, дьахталлар тэҥ бырааптаныы, ийэ, оҕо доруобуйатын көрүү-истии, үөрэхтээх, үлэлээх буолуу боппуруостарын көтөхпүттэрэ. Оччоттон баччаҕа диэри дьахтар-аймах дойду олоҕор-дьаһаҕар сүҥкэн суолталаах үлэни тэрийэр, иилиир-саҕалыыр.

Наталья Борисова, Амма улууһун олохтооҕо: "Быйылгы сийиэс дойду олоҕор сүрдээх суолталаах, 100 сылллаах гражданскай хамсааһыны көҕүлүүр суолталаах тэрээһин диэн сыаналыыбын".

Үс сыллааҕыта дьахталлар 15-с сийиэстэрэ өрөспүүбүлүкэ  төрүттэммитэ 100 сылыгар ананан тэриллибитэ. Онтон быйыл аан бастакы сийиэс 100 сыллаах үбүлүөйүгэр анаан киэҥ далааһыннаах тэрээһин ыытыллынна.

Зоя Порядина, Алдан улууһун олохтооҕо: "Сийиэс бырагыраамата олус киэҥ. Мин маастардар хайысхаларын сэҥээрэн сырыттым". 

Премьер-миниистир Кирилл Бычков дьахтар оруола уопсастыбаҕа сүҥкэн суолталааҕын, үүнэр көлүөнэни иитиигэ эрэ буолбакка, социальнай эйгэ уонна экономика сайдыытыгар улахан кылааты киллэрэллэрин  бэлиэтээтэ, итиэннэ судаарыстыбыннай наҕараадалары туттарда. Махтал суруктар, "Гражданскай килбиэн" бэлиэлэри тэҥэ, 25 элбэх оҕолоох ийэҕэ "Ийэҕэ албан аат" 2 уонна 3 истиэпэннээх наҕараадалары туттарда. Кинилэр ортолоругар Булуҥ улууһуттан сылдьар 8 оҕолоох Евгения Филиппова-Моисеенко киирдэ.

Евгения Филиппова-Моисеенко, Булуҥ улууһун олохтооҕо: "Оҕону үлэҕэ уонна бэриниилээх буолууга иитиэххэ наада быһылаах. Мин икки уолум кадеттар. Эдэр ийэлэр саллыбакка оҕолоноллоругар баҕарабын. Билигин судаарыстыба олус көмөлөһөр".

Оттон Ольга Тумусова бастакы сийиэс сүүс сыллаах үбүлүөйүгэр делегат быһыытынан кэлэ сылдьар. Үөһээ Бүлүү улууһун дьахталларын түмсүүтүн салайар, улуустарыттан 17 буолан кэллибиттэрин  кэпсиир. Ольга Ивановна дьахталлар түмсүүлэрэ киэҥ далааһыннаах үлэни ыытарын, кэккэ көҕүлээһиннэри олоххо киллэрбитин этэр.

Ольга Тумусова, Үөһээ Бүлүүтээҕи дьахтар түмсүүтүн бэрэссэдээтэлэ: "Улууспут үрдүнэн сүрдээх көхтөөх түмсүүлэр, дьахтар хамсааһына араас өттүнэн күүскэ бара турар. Ол курдук 100 үтүө дьыалабытын толоруохпут диэн эрэллээхтик үлэлии сылдьабыт". 

3 күн устата үбүлүөйдээҕи тэрээһин кытыылаахтара киэҥ бырагырааманан үлэлээтилэр. Дьахтар, ийэ киһи дьиэ кэргэниттэн саҕалаан бүтүн дойду сайдыытыгар улахан кылаатын уурар. Онон ийэ киһи бигэ туруктаах, сайдыылаах буоллаҕына, инникигэ эрэл баар.