Саха сиригэр норуот маастарын күнэ киэн далааһыннаахтык ыытыллынна

Үгэс быһыытынан норуот маастарын күнүгэр дьон, норуот сахалыы таҥнан симэнэн сэлэлии хаамтылар. Быйыл хаамыыга тыһыынчаттан тахса киһи көхтөөх кыттыыны ылла.

Анна Исмакова, норуот маастара: «Томмоттон сылдьабын. Бары маастардар баран иһэбит култуурабытын өрө тардаарыбыт».

Норуот маастардарын түмэр тэрээһин быйыл 15 төгүлүн ыытыллар. Бу сыллар устата үтүө үгэскэ кубулуйан, кэҥээн, кыттааччыта элбээн, элбэх талааны арыйан кэллэ.

Быйыл 30 улуустан 700-тэн тахса маастар кыттыыны ылар. Сунтаар улууһуттан төрүттээх, иис-уус эйгэлээх Маргарита Таисеева Сергей Зверев - Кыыл Уола суруйбут олоҥхотугар олоҕуран айбыт оҥоһуктара элбэх киһи болҕомтотун тарта.

Маргарита Алексеева, норуот маастара: «Кэлбит дьон Зверев олорор диэтилэр, наһаа сэҥээрдилэр. Оҕолорго сөптөөх үөрэх медотическай пособие курдук көрдүлэр».

Бу күн биллэр муосчут Алескей Андреев Олоҥхоҕо олоҕуран оҥорбут саҥа үлэтин сүрэхтээтэ. Кини сэлии муоһуттан айан, чочуйан саахымат оҥорбут, бу үлэтинэн сотору Казахстаҥҥа өрөспүүбүлүкэ чиэһин көмүскүү барыахтаах.

Алексей Андреев, муосчут: «Олонхо култуурабыт биир чаҕылхай аҥара. Бу тиэмэҕэ элбэхтэ үлэлээбитим. Барыта сэлии муоһуттан оҥоһулунна».

Сылын аайы норуот маастардарыгар уонна тимир устарыгар Ил Дархан анал стипендията көрүллэр. Күн бүгүн өрөспүүбүлүкэ үрдүнэн 300 тахса норуот маастара, 700 тахса норуот уус-уран оҥоһуктарын маастара баар.

Сергей Местников, СӨ бырабыытылыстыбатын бэрэссэдээтэлин солбуйааччы: «Норуот маастардарын кытта аттыларыгар эдэр ыччат эбэтэр оҕо турара киһини үөрдэр. Аҕа саастаах дьоннор бэйэлэрин талааннарын үүнэр көлүөнэҕэ тириэрдэллэр».

Бу бэлиэ күҥҥэ хас биирди маастар эрдэттэн, сыл иһигэр бэлэмнэнэн кэлэр. Саҥа оҥоһуктарын, айбыт үлэлэрин дьон көрүүтүгэр таһаарар. Норуот маастарын күнэ хас да күн ыытыллыаҕа. Быыстапка таһынан күрэхтэр, маастар-кылаастар ыытыллыахтара.