Саха сиригэр төрүүр-ууһуур доруобуйаҕа эппиэтинэстээх сыһыан нэдиэлэтэ ыытыллар

Таатта улууһуттан сылдьар Ирина Харова перинатальнай кииҥҥэ аҕыйах хонуктааҕыта этэҥҥэ оҕолонон балыыһаттан тахсарга бэлэмнэнэр. Ийэ саҥа төрөөбүт кырачаанын бэйэтин үүтүнэн аһатар. 3810 грамм ыйааһыннаах, 55 см уһуннаах уолчаан сааскы маҥнайгы күҥҥэ күн сирин көрбүт. 

Ирина Харова, Таатта улууһун олохтооҕо: «Бэнидиэнньиккэ киирбитим, кулун тутар маҥнайгы күнүгэр оҕоломмутум. Төрдүс оҕом. Этэҥҥэ ааста, кыратык дабылыанньалаах этим, ол иһин эрдэ киллэрбиттэрэ».

Хат дьахталлар ортолоругар бүгүҥҥү күҥҥэ үрдүк дабылыанньа уонна сахарнай диабет курдук ыарыы элбэхтик бэлиэтэнэр диэн Перинатальнай киин акушер-гинеколог бырааһа Зарина Прохорова бэлиэтиир. Маныаха кииҥҥэ тустаах патология салаатыгар ыарыылаахтары көрөн-истэн, эмтээн төрүүргэ бэлэмнииллэр.

Зарина Прохорова, перинатальнай киин акушер-гинеколог бырааһа: «Саахарнай диабет диагностаахтар дабылыанньалара үрдүк буолар, саахардара үрдүк буоллаҕына улахан ыйааһыннаах оҕону төрөтөллөр».

Оҕо туруга биллэн туран ийэтин доруобуйатыттан быһаччы тутулуктаах. Маныаха оҕо төрөөтүн кытта тустаах чинчийиини ааһан ыарыыны эрдэттэн сэрэтиигэ болҕомто уураллар.

Светлана Сивцева, перинатальнай кииҥҥэ оҕо бырааһа: «Бастаан төрөөт даҕаны гепатит В утары прививка ылаллар, үһүс күннэригэр БЦЖ туберкулез утары прививка ылаллар. Кардиологическай скрининг диэн улахан сүрэх пороктарын билэр ньыма уонна неонатальный скрининг диэни ааһаллар, ол 36 генетическай ыарыыны билэр анализ».

Саха сиригэр бу күннэргэ төрүүр-ууһуур доруобуйаҕа уонна чөл туруктаах хат буолууга эппиэтинэстээх сыһыан нэдиэлэтэ ыытыллар. Соторутааҕыта медицинэ национальнай киинигэр оҕо репродуктивнай доруобуйатын киинэ аһыллан үлэтин саҕалаата. Манна оҕо гинеколога уонна уролог-андролог бырааһа бу хайысхаҕа үлэлиэхтэрэ.

Валентина Саввина, педиатрическай киин дириэктэрин оҕо хирургиятыгар солбуйааччы: «Оройуоннартан гинекологтар, хирургтар оҕолору көрөллөр уонна паталогиялаах буоллахтарына биһиэхэ ыыталлар».

Исписэлиистэр этэллэринэн, киһи доруобуйатыгар саамай сүрүн түһүмэҕинэн 10 сааскыттан 17-ҕэр диэри саас буолар, бу кэмҥэ киһи организма ситэн, туох эмит кэһиллии баар түгэнигэр эрдэттэн сэрэтии ирдэнэр. Маныаха оҕо эрдэхтэн төрүүр-уһуур доруобуйа туругар тустаах болҕомто ууруллара хайаан да наада.