Хотугу төрүт дьарык сайдыытыгар чуум үлэһиттэрин оруола улахан

3 ыстаада табалара хайалаах сиргэ мэччийэллэр. Онон салаа устун ыһыллан хааланнар ааҕыы кэмигэр табаһыттар сыралаһан туран хомуйан киллэртээтилэр. Барыларын чөмөхтөөн, күөйэ тутан хараалга хаайыыга күн аҥаара барда.

Оттон бу кэмҥэ чуум хаһаайкалара тоҥон-хатан кэлбит табаһыттары ас бэлэмнээн түбүгүрэллэр. Дьиэ иһэ сып-сылаас, тимир оһох умайан   тыһыргыыр. Сарсыардааҥҥыларын аһаталаан баран охсубут тиэстэлэрэ номнуо тахсан, эриллибит таба этин суулууллар. Манна күн өрүү өрүү бурдук ас буһар.

Анна Слепцова, чуум үлэһитэ: «Күнүһүн хайаан даҕаны соркуой курдук, киэһээ хайаан да күөс, итии миин».

"Булуҥ" тэрилтэ биирдии ыстаадаҕа иккилии чуум үлэһити тутар. Күн устата ас бэлэмниири таһынан кинилэр таҥас тигэллэр, тирии имитэллэр. Онон түбүк күн устата бүппэт. Нам улууһуттан сылдьар Татьяна Соловьева ыстаадаҕа олорбута быйыл бэһис сыла. Дойду сиртэн кэлбит киһи туундара олоҕун олус сөбүлээбитин үллэстэр.

Татьяна Соловьёва, чуум үлэһитэ: «Сирин аһа буолнай, сугун күп-күөх. Алтынньы ыйга тоҥмут хаптаҕас үргүүбүт, тэллэй буолнай. Наһаа үчүгэй».

Оттон түбүктээх үлэ кэннэ чуум иһэ киэһэ күө-дьаа буола түһэр. Киэһээҥҥи аска сааскы төрүөҕү, табаны араарыы туһунан кэпсэтиилэр тахсаллар. Хаһаайыстыба үлэ усуолуобуйатын тэрийиигэ улахан болҕомтону уурар. Күргэн интернет ситимэ, уот-күөс хайаан да ыстаадаларыгар холбуур. Маныаха үлэ миэстэтин таһааран таба ахсаанын сыллата элбэтэр.

Руслан Лукин, "Булуҥ" хаһаайыстыба дириэктэрэ: «Сөптөөх усулуобуйа тэрийэргэ болҕомто уурабыт. Өрөспүүбүлүкэ салалтата тэрээһиннэри тэрийэр».

Оттон хоту дойду маанылаах кыылын иитии сайдыытыгар чуум үлэһиттэрин оруола улахан. Күн бүгүн Саха сиригэр 300 дьахтар ыстаадаҕа үлэлиир. Билигин өрөспүүбүлүкэ бары табаны иитэр хаһаайыситыбаларыгар былдьаһыктаах күннэр. Сотору кэминэн буолуохтаах табаһыт сийиэһигэр уонна сүлүөтүгэр диэри сааскы ааҕыыны үмүрүтэр сорук турар.