Кулун тутар 1 күнүттэн Өлүөнэ очуостарыгар сааскы сынньалаҥ саҕаланна

Сандал сааһы көрсө Өлүөнэ очуостара нациоанльнай паарка үлэтин саҕалаата. Сезон арыллыытын күнүгэр, төһө да халлаан тымныы, тыаллаах буоллар дьон элбэх. Саҥардыллыбыт национальнай паарканы бастакынан Герасимоватар дьиэ кэргэн сыаналаата.

Жанна Герасимова, Дьокуускай куорат олохтооҕо: «Кып-кыччыгый кирилиэс этэ. Нэһиилэ халтырыйан аҕай тахсыбыппыт. Бу сырыыга тахсарбытыгар киэҥ, үчүгэй, табыгастаах».

Саха сирин биир саамай кэрэ көстүүлээх, айылҕалаах,  ураты миэстэнэн Өлүөнэ очуостара буолар. Саха дьоно-сэргэтэ манна кэлэн сынньанан, күүс-уох ылан барар.

Маны таһынан академик Никита Соломонов аатынан очуоска диэри айан суола оҥоһуллунна. Итиэннэ паарка уота-күөһэ өссө сандаарда. 

Хаҥалас улууһун олохтооҕо Татьяна Петрова паарка арыллытыгар анаан-минээн сахалыы таҥаһын симэнэн кэлбит. Кырдьык да, ыллык кэнээбит уонна уһаабыт. Киһи сынньана, аа-дьуо тахсар буолбут диэн үөрэ кэпсиир.

Татьяна Петрова, Хаҥалас улууһун олохтооҕо: «Киһи аа-дьуо хааман тахсар сирэ буолбут. Тахсаммын сүрдээҕин үөрдүм. Сайын-күһүн тахсарга олус үчүгэй буолбут».

Сылын аайы национальнай пааркаҕа Өрөспүүбүлүкэттэн эрэ буолбакка, Арассыыйаттан, Аан Дойдуттан тиийэ элбэх ыалдьыт кэлэр. Быйыл  "Өлүөнэ очуостара" национальнай паарка тохсус сезона,  инникитин да өссө элбэх былааннаах. 

Аркадий Семёнов, "Өлүөнэ очуостара" айылҕа национальнай пааркатын дириэктэрэ: «Эһиилгиттэн сайаапкабытын биэрдибит 200 мөл. туристическай эбийиэктэргэ. Сүрдээх улахан эппиэтинэстээх үлэ. Мин санаабар Саха сирин урбаанньыттара сөптөөх эбийиэкитэри көмүскээн 2026 сылга киллэриэхпит диэн баҕа санаалаахпыт».

Быйылгыттан "Туризм уонна ыалдьытымсах буолуу" национальнай бырайыак үлэтин саҕалыыр. Бу бырайыак олоххо киирэн салаа сайдыытыгар саҥа ситиһиилэри аҕалыахтаах. Бырайыак чэрчитинэн кыһыҥҥы сынньаланна ордук болҕомто ууруллуоҕа.