Дьокуускайга "Мин идэм - ИТ" диэн күрэх буолан ааста

Альбет Николаев уонна Эрчим Тимофеев - Сунтаардааҕы политехническай лицейы быйыл бүтэрэр сыллара. Уолаттар иккиэн 7 кылаастан саҕалаан ИТ эйгэтин баһылыыллар. "Мин идэм - ИТ" диэн конкуруска уолаттар социальнай хайысхалаах мобильнай оонньуу оҥоруутугар сорудах ылан үлэлииллэр.

Эрчим Тимофеев, Сунтаардааҕы политехническай лицей 11 кылааһын үөрэнээччитэ: «Биһи оонньуу айыахтаахпыт. Уопсастыбаҕа туһалаах оонньуу буолуохтаах. Биһи үчүгэй сюжеттаах новелла оҥоробут».

Бу күрэххэ улуустарыгар бастаабыт оҕолор уонна устудьуоннар уопсайа 200-тэн тахса ыччат хамаанадаларга арахсан 5 сорудаҕы үрдүк таһымнҥа толорон кыайыылаахтары талыахтара. Бу  хакатон уратыта  диэн үлэли-хамныы сылдьар бөдөҥ тэрилтэлэр дьиҥ наадыйар сорудахтарын кыттааччылар оҥороллор.

Ярослав Иванов, Горнай улууһун Бэрдьигэстээх гимназиятын 10 кылааһын үөрэнээччитэ: «Патриот диэн молодежнай кииҥҥэ сорудах биэрдилэр, онно сайт оҥоруохтаахпыт. Үлэбит саҕаланна».

Ол курдук сайт, мобильнай сыһыарыы, оонньуу, афиша онтон да атын араас хайысхалаах ИТ бородуукталары бэлэмниэхтээхтэр.

Куонкурус үөрүүлээх аһыллыытыгар Ил Дархан Айсен Николаев ыалдьыттаата. Кини аныгы кэм ирдэбилинэн информационнай технология балысханнык сайдар кэмигэр саха ыччата наадалаах идэлэри баһылыырыгар маннык күрэхтэр төһүү буолаллар диэн бэлиэтээтэ. Бу куонкурус Саха сиригэр 2016 сыллахтан ыытыллар, бастаан 60 эрэ оҕо кыттыбыт эбит буоллаҕына, билигин тэрээһин номнуо тыһыынчананан оскуола үөрэнээччитин, устудьуону хабар.

Владислав Хабаров, СӨ идэҕэ урутаан үөрэтэр киин дириэктэрэ: «2024 сыт түмүгүнэн уопсайа 10-тан тахса тыһ. оҕо өрөспүүбүлүкэ үрдүнэн хабылынна. Биһи санаабытыгар сүрдээх сүҥкэн көрдөрүү буолар. Саамай киэн туттарбыт – 2016 сылтан өрөспүүбүлүкэ иһигэр саҕаламмыт күрэх билигин Арассыыйа үрдүнэн иккиһин ыытыллаары турар».

Ол курдук быйыл күрэх Арассыыйа хас даҕаны регионугар тэриллэр, финала 12 куораттарынан ыытыллыаҕа. Тааттатааҕы лицей 10 кылааһын үөрэнээччитэ Аэлита Петрова 5 кылаастан ИТ эйгэтин күрэхтэригэр кыттар.

Аэлита Петрова, Тааттатааҕы лицей 10 кылааһын үөрэнээччитэ: «Маннык тэрээһиннэр наһаа үчүгэйдэр дии саныыбын. Араас сайтары, сыһыарыылары, оонньуулары оҥорон көрбүппүт. Оҕолорго маннык тоҕоос биэрэллэрэ үчүгэй».

Куонкурус сүрүн сыала - улаатан эрэр оҕолорго, ыччакка ИТ үөрүйэхтэрин иҥэрии, итиэннэ бу эйгэ идэлэрин тарҕатыы уонна талааннаахтары өйөөһүн буолар.