Улуустарга "Муус Устар - 2025" ыччат бэстибээлигэр сүүмэрдиир күрэхтэр ыыттыллаллар
Өрөспүүбүлүкэ ыччатын түмэр улахан хамсааһын "Муус устар" бэстибээл улуус таһымнаах күрэстэрэ 11 хайысхаҕа арахсан ыытылла тураллар. Ол курдук "Сулустар" ырыа толорооччуларын уонна "Күн" диэн үҥкүү ансаамбылларын күрэстэрэ Горнай улууһугар ыытылынна.
Сардаана Максимова, улуус дьаһалтатын ыччакка бэлиитикэтигэр уонна физическэй култуураҕа салаатын салайааччы: "Уопсайа 13 ырыаны сэргиир ыччат кэлэн кыттыыны ыла сылдьар. Быйылгы күрэх сүрүн ирдэбилэ – сэриигэ аналлаах ырыалар".
Бэрдьигэстээх гимнзиятын физикэҕэ учуутала, улуус дэгиттэр дьоҕурдаах ыччата Иван Дьяконов ааспыт сылга "Муус устар" бэстибээлгэ ырыа күрэһигэр улууһун чиэһин көмүскээбитэ, өрөспүүбүлүкэ таһымнаах тэрээһиҥҥэ кыттан бэйэтигэр өссө эбии саҥаны арыйбыта, элбэҕи билбитэ. Оттон быйылгы улуус сүүмэрдиир күрэһигэр кини дьүүллүүр сүбэҕэ үлэлээтэ.
Иван Дьяконов, дьүүллүүр сүбэ: "Былырыыҥҥы күрэскэ толорооччу ырыатын көрөөччүгэ төһө тириэрдэрин ордук таба көрөллөр эбит диэн бэлиэтээбитим. Ыллыыр ырыаҕын бэйэҥ искинэн хайдах аһараргын көрөллөр. Итини сэргэ куолас күүстээҕэ эмиэ, биллэн турар, ирдэнэр".
Күөрэлээх бөһүөлэгин сынньалаҥын киинин уус-уран салайааччыта Анна Корякина "Сэттэ кут туруйа" ырыанан күрэскэ кытынна итиэннэ "Кураж " бөлөххө үҥкүүнү эмиэ туоруорбуттар
Анна Корякина, Күөрэлээх бөһүөлэгин сынньалаҥын киинин уус-уран салайааччыта, күрэс кыттааччыта: "Оҕо эрдэхпиттэн ыллыырбын олус сөбүлүүбүн. Эрдэ күрэхтэргэ кыттан көрө иликпин. Бэйэбэр эрэллээхпин. Оттон үҥкүүгэ биэс буолан кыттабыт. Икки күн иһигэр нүөмэр туруордубут".
"Сулустар" ырыа курэһин түмүгүнэн Солоҕон нэһилиэгин аатыттан кыттыбыт Айыына Леонтьева олус истиҥник-ыраастык, үчүгэйдик ыллаан дьүүллүүр сүбэ кинини кыайыылааҕынан быһаарда. Айыына бу курэскэ Дьокуускай куораттан анаан-минээн кытта кэлбит.
Айыына Леонтьева, "Сулустар" күрэс улуустааҕы түһүмэҕин кыайыылааҕа: "Улахан кылаастан ыллыыбын. Бу иннинэ “Туой Хайа”, “Эн сулускун” курдук күрэхтэргэ кытта сылдьыбытым".
"Күн" үҥкүү күрэһигэр уопсайа түөрт ансаамбыл кыттыыны ылбытыттан Маалтааны нэһилиэгин оҕолорун "Чөмчүүк" үҥкүү бөлөҕө кыайыылаах тахсан, улуус аатын бүтүн өрөспүүбүлүкэҕэ көмүскүүр чиэскэ тигистэ.