СӨ Үүнэр көлүөнэ тыйаатыра сааскы гастролга айаннаата

Мас дьааһык эрэллээхтик хаппахтанна. Бу сыана декорацията алдьаммакка оннун булуохтаах. Үүнэр көлүөнэ тыйаатыра Уус Алданҥа гастролга айаннаата. Манна хас биирдии малы буккуйбат туһуттан, барыта наарданан сытар. Артыыс тус бэйэтин малын эмиэ үчүгэйдик дьаһаныахтаах.

Георгий Бессонов, СӨ Үүнэр көлүөнэ тыйаатырын артыыһа: "Сыттык, тэллэх, утуйар мөһөөччүк, ас буһарынар тэриллэрбитин илдьэ барабыт. Урут ыалларынан түһэр этибит. Билигин оннук гыммаппыт, кулууптарга хонобут".

Тыйаатыр Уус Алдан улууһугар икки испиктээкили дьон-сэргэ дьүүлүгэр таһаарыаҕа. Номоххо киирбит, саха боотура Майаҕатта Бэрт Хара туһунан уонна Тимофей Сметанин айымньытыгар олоҕуран турбут "Күөрэгэй" оҕо испиктээкилин көрдөрүөҕэ.

Александр Титигиров, СӨ Үүнэр көлүөнэ тыйаатырын сүрүн режиссёра: "Уус Алдан дьоруойун Майаҕатта Бэрт Хараны бу соторутааҕыта премьералаабыппыт. Онтубутун илдьэ баран эрэбит. Баран иһэн син биир туох баар сиэри-туому тутуһабыт. Артыыстарбыт оптуобуска олордулар эрэ ыллаабытынан бараллар. Онон ыллыы-ыллыы айанныыбыт".

Елизавета Далбараева тыйаатырга үлэлээбитэ 8 сыла. Хас биирдии артыыс гастролу күүтэр. Айан суола, олохтоохтору кытта көрсүһүү, атын сыана - бу барыта долгутулаах диэн үллэстэр.

Елизавета Далбараева, СӨ Үүнэр көлүөнэ тыйаатырын артыыһа: "Саҥа дьыл кэннэ гастрллу кэтэһэн бараҕын. Ити бэйэтэ эмиэ туспа романтика диэххэ сөп. Тыйаатыр тиийэрэ ахсааннаах, онон наһаа үчүгэйдик көрсөллөр".

Үүнэр көлүөнэ тыйаатыра быйылгы сезонун Улуу Кыайыы 80 сылыгар анаабыта. Үбүлүөйдээх сылга үс улахан испиктээкили бэлэмнии сылдьар. Онон артыыстар гастрол кэннэ аны саҥа туруорууга бэлэмнэниэхтэрэ. 

Алексей Павлов, СӨ Үүнэр көлүөнэ тыйаатырын уус-уран салайааччыта: "Михаил Шолохов “Киһи дьылҕата” айымньытынан турбут испиктээкил көстүөҕэ. Бу маны сүрүн режиссербут Александр Титигиров туруорар. Маны сэргэ “Ытык Бүлүү мохсоҕоллоро” диэн Сэбиэскэй Сойуус Дьоруойдара Николай Кондаков, Алексей Миронов, Николай Степанов тустарынан туруоруу тахсыахтаах. Маны Валентина Якимец туруоруоҕа". 

Сылын аайы гастрол бырагыраамата уларыйа турар. Быйыл анаан-минээн Уус Алдан улууһун таллылар. Онон олохтоохтору кытары көрсөргө толору бэлэмнэр уонна кинилэри долгуйа күүтэллэр.

Гастрол бастакы күнэ Сыырдаах нэһилиэгиттэн саҕаланна, бүгүн артыыстар Найахы нэһилиэгэр испиктээкил көрдөрүөхтэрэ, ол кэннэ салгыы айанныахтара.