Саха сириттэн соҕотох Бойобуой Кыһыл Знамя уордьан кавалера Ариан Игнатьевка аналлаах быыстапка арылынна

Үтүө киһи аата үйэлэргэ хаалар. Оттон кини хорсун быһыыта холобур буолар. Тэрээһиҥҥэ мустубут хас биирдии киһи Ариан Иванович Игнатьев туһунан үтүө эрэ тыллары этэллэр. Кинини кытта алтыспыт дьон бары кэриэтэ Ариан Ивановичы хайа да түгэҥҥэ кырдьыгы, сиэрдээх буолууну, киһилии сыһыаны өрө тутарын бэлиэтиир.

Александр Лукин, СӨ ис дьыала министиэристибэтин бэтэрээнэ: "Сүрдээх холку уонна бэһиэлэй майгылаах. Наар уһуну-киэҥи толкуйдуу сылдьар, икки-үс хардыы иннин диэки толкуйдуу сылдьар киһи этэ. Ариан Иванович оччолорго олох эдэр сылдьан хорсун быһыы оҥорбута олус суолталаах".

Ариан Иванович номоххо киирбит дьоруойдуу быһыытын бары билиэх тустаахпыт. Кини 1975 сыл олунньу ыйыгар ыар буруйу оҥорон баран куотан иһэр сэбилэниилээх бөлөҕү тохтоппута. Оччолорго 28 саастаах эдэр силиэдэбэтэл ыксаллаах быһыы-майгы үөскээбитигэр уолуйан турбакка, бэйэ да олоҕун кэрэйбэккэ бандьыыттары соҕотох тохтоторго санаммыта. Ол күн кинини уонна суоппарын хаайыылаахтар бааһырдыбыттара.

Николай Никитин, милиция полковнига, сынньалаҥҥа олорор мировой судьуйа: "Ариан Иванович улахан хорсун быһыы оҥорон Саха сирин дьонугар бастакы уордьаны ылбыта. Мин ол саҕана 9 кылааска үөрэнэр этим. Хаһыаттан ааҕаммын, кини миэхэ холобур буолбута". 

Оттон Ариан Иванович үлэтигэр эрэ буолбакка дьиэ кэргэнигэр эмиэ бэриниилээх этэ. Бастыҥ эр, аҕа, эһээ, хос эһээ. Олоҕун аргыһа Анна Георгиевналыын 40-ча сыл кэриҥэ бииргэ өйөһөн-өйдөһөн олорбуттар. Ариан Иванович олоҕун тухары сүрэҕин аҥаарын хаартыскатын паспорын хаҕыгар уктан илдьэ сылдьыбыт.

Анна Бессонова, Ариан Игнатьев ойоҕо: "Дьиэҕэ наһаа сайаҕас, оҕолорго наһаа таптыыр, сиэннэрин олус атаахтатар этэ. Оҕолорун, сиэннэрин хотунан-соҕуруунан илдьэ сылдьан сири-дойдуну көрөдөрөр идэлээх этэ".

Быыстапкаҕа Ариан Игнатьев наҕараадалара, үлэтин докумуоннара, киниэхэ анаммыт кинигэлэр, хаартыскалар турдулар. Экспозиция арыллыытыгар үөлээннэхтэрэ, чугас дьоно эрэ буолбакка үгүс эдэр ыччат мустан сэҥээрэн көрдүлэр. Онон кини хорсун быһыыта үйэлэргэ көлүөнэттэн көлүөнэҕэ тиэрдиллэр.