Мандар Уус 80 сааһын көрсө бастыҥ уустар түмүстүлэр

Саха төрүт үгэһин үйэлэри уҥуордаан илдьэ кэлбит тимир уустарын түһүлгэтэ сыл аайы  өрөспүүбүлүкэ бастыҥнарын түмэр. Быйылгы күрэх  ытык киһибит Мандар Уус 80 сааһыгар ананна. Уустар 3 көрүҥҥэ күрэхтэстилэр.

Быйылгы күрэх саамай элбэх кыттааччылааҕынан билиннэ. Маны сэргэ кыттааччы эдэримсийбитин  тэрийээччилэр үөрэ бэлиэтииллэр.

Гаврил Андросов, "Дархан Уус" Саха сирин тимир уустарын сүрүн быыстапкатын тэрийээччи: "Сүрдээх эдэр уустар баар буоллулар. Кинилэр эдэр ахсымнаах дьон быһыытынан дьоһуннук кытталлар аҕа саастаах дьону кытта тэҥҥэ күөнтэһэллэр. Уонна сүрдэх улахан быыстапкаларга Москваҕа тиийэ кытталлар. Онон сүрдээх тыҥааһыннаах күрэх". 

Таатта улууһуттан сылдьар, эдэр тимир ууһа Феликс Шамаев "Дархан Ууска" сылын аайы кыттар. Былырыын биир көрүҥҥэ кыайыылаах үрдүк аатын ылан турардаах, быйыл да туора турбата,  саҥа үлэтин аҕалбыт.

Феликс Шамаев, тимир ууһа: "Быйыл уус-уран хайысхаҕа “Көтүтүү” диэн үлэни аҕаллым. Манна оҕо атынан көтүтэн иһэрин оҥордум. Сылы быһа толкуйдаан, сүбэ-ама ылан, эбэн-сабан оҥордум".

"Дархан Уус" түһүлгэтигэр киһи тоҕуоруһа мустубут. Улахан болҕомтону Мандар Уус оҥорбут үлэлэрэ ыллылар. Үбүлүөйдээх сылын чэрчитинэн анаан-минээн Тааттаттан Баайаҕа нэһилиэгин түмэлэ хас да үлэтин аҕалбыт. Мандар Уус айан-тутан оҥорбут боотур дуулаҕа куйаҕын, дархан батыйатын уонна да атын үлэлэрин кэлбит дьон тутан-хабан көрдө.

Николай Егоров-Баайаҕыын, Таатта улууһун "Мандар Уус" саха олоҕун көрдөрөрө түмэл дириэктэрэ: "Бу убайбыт оҥоһуктарын аҕаллыбыт. Наһаа аҕыйах үлэлэрэ биһиэхэ баар. Тоҕо диэтэр Мандар Ууска оҥотторбут дьон бэйэлэрэ илдьэ сылдьаллар. Бу музейга анаан оҥорбут оҥоһуктара".

Бастыҥ "Уус - уран оҥоһуулаах быһах" аатын Дьокуускай куораттан Сандал Мордосов үлэтэ ылла. Оттон "Бастыҥ ас быһаҕа" күрэх кыайыылааҕынан Таатта улууһуттан Степан Пахомов буолла. "Дэгиттэр быһах" бастыҥ аатын Дьокуускай куораттан Илья Готовцев ылла. Кыайыылахтар Дархан Уус анал бэлиэнэн наҕараадаланнылар.