Майаҕа тюльпаннар ситэллэр

Таһырдьа кыһын, оттон Санниковтар теплицаларыгар сандал саас бэлиэтэ тюльпан  номнуо сибэккилии турар. Хас күн аайы бу курдук сиппиттэрин көрөн хомуйаллар. Онон олунньу саҥатыттан саҕалаан кэрэ аҥаардарга кэрэни бэлэхтээбитинэн бараллар. Саха сиригэр эриэккэс үүнээйини кинилэр олордубуттара быйыл төрдүс сыла. Онон бу дьыаланы баһылыы тутан, быйыл кэҥээбиттэр.  

Вячеслав Санников, сибэкки үүннэрээччи: "Сылаас теплица тутуннубут. Мантыбыт кыракый атыылыыр лааппылаах уонна харайар сөрүүн сирдээх. Ол иһин мантан инньэ тюльпаннарбыт хаачыстыбалара өссө тупсар. Сөптөөх усулуобуйаҕа үүппүт тюльпан дьиэҕэ да тиийдэҕинэ уһуннук турар". 

Бу ахсынньы ыйга олорбут тюльпаннар билигин маннык силигилээн тураллар, аны аҕыйах хонугунан сааскы маҥнайгы бырааһынныьыкка бары тэҥинэн ситиэхтэрэ. Дьиэ кэргэн бастакы сылларыттан  гидропоника диэн ууга олордор ньыманы ордорбуттар. Үүнээйилэр тус туһунан иһиттэргэ силис тардан үүнэллэр. 

Надежда Санникова, сибэкки үүннэрээччи: "Биһиги ууга олордобут. Оччоҕо силиһэ ып-ыраас буолар, уутугар битэмииннэри кутабыт. Ууга үүнэр тюльпан суон уонна көстүүтэ кыраһыабай буолар".

Анал теплицаҕа, туһааннаах усулуобуйаҕа үүнэр буоланнар сиэбэккилэр олус бөдөҥнөр, уктара көнө уһун. Билигин 16 араас суорт тюльпан үүнэ-силигилии турар. Араас дьэрэкээн өҥнөөхтөр: кыһыл, оруосабай, фиолетовай, онтон да атын эгэлгэ өҥ-дьүһүн хараҕы сылаанньытар.

"Санниковтар дьиэ кэргэн сибэкки ферматыгар 20 тыһыынча тюльпан үүнэн турар. Бу көрүҥ үүнээйини биһиги тыйыс усулуобуйабытыгар үүннэриигэ сүрүн кистэлэҥ – сырдык уонна сөрүүн".

Итини сэргэ биир тэҥ температура, салгын сиигэ, хамсааһына, анал көрүү бэйэ кистэлэҥ ньымалара барыта сүрүн оруоллаах. Бу дьарык Санниковтарга эбии дохуот аҕаларын тэҥэ оҕолору үлэҕэ уһуйууга, дьиэ кэргэнинэн бириэмэни тэҥҥэ атаарыыга көҕүлүүр. 

Вячеслав Санников, сибэкки үүннэрээччи: "Биһиги Сахабыт сиригэр сыалбыт-сорукпут сааһы эрдэ аҕалыы, дьоҥҥо үөрүүнү-көтүүнү бэлэхтээһин диэн. Инньэ гынан бу дьарыкпытын биһиги олус сөбүлүүбүт". 

Надеждалаах Вячеслав салгыы сайыҥҥы сибэккилэри олордор баҕалаахтар. Онон сотору кэминэн теплица сылы эргиччи кэрэ уйата буолуо.