Арктикатааҕы эпос уонна искусство киинин тас өттүн оҥорууга киирдилэр

7 этэстээх, 33 тыһ. кв. миэтэрэ иэннээх, 1,5 тыһ. тахса олорон көрөр миэстэлээх сүүнэ улахан Арктикатааҕы эпос уонна искусство киинэ бытаан хаамыынан да буоллар бүтэр уһугар тиийэн эрэр. Бүгүҥҥү күҥҥэ эбийиэккэ ититии ситимэ тардыллан, атын коммунальнай-инженернэй ситимнэри тардыы, ону тэҥэ ис-тас, үлэлэр барар тураллар.

Николай Васильев, тутуу прораба: "Билигин эбийиэкпитигэр ититии ситимин ситэрии, уотун тардыы уонна ис-тас өттүн оҥоруу бара турар. Тас бүрүөһүнүгэр 40 киһи үлэлиир. Уопсайа 200 тахса үлэһиттээхпит".

Бөдөҥ тутуута 200-чэкэ кэриҥэ киһи үлэлиир, бэдэрээт тэрилтэлэрэ тус-туһунан эбээһинэстэри толороллор. Саха олохтоох ыччата эмиэ кыттар. Бу судаарстыбыннай-чааһынай бииргэ үлэлэһии бырайыага олоххо киирэр. Ону тэҥэ дойду регионнарыттан эмиэ тутааччылар кэлэн үлэлии сылдьаллар.  

Николай Яблоновский, тутуу үлэһитэ: "Хас биирдии хапталҕаны көтө-көтө тимиринэн кытаатыннаран биэрэбит. Бу маннык үөһээҥҥи диэри оҥоруохпут". 

Манна Саха сирин судаарыстыбыннай филармонията, Олонхо уонна Саха тыйаатырдара дьиэлэниэхтэрэ. Ону тэҥэ манна дьоҥҥо анаммыт улахан тэрээһиннэргэ анаммыт саала, быыстапкалыыр, сиэр-туом ыытар сааллар, репетициялыыр зоналар, тыаһы-ууһу суруйар студия баар буолаллара күүтүллэр. Баараҕай култуура кластера ураты оборуудабанньанан таҥыллыаҕа. Панорамнай сыана-трансформер хайа баҕарар үрдүккэ көһө сылдьыан сөп буолуоҕа. Онон бу кииҥҥэ классическай кэнсиэрдэртэн тыйаатыр турорууларыгар тиийэ улахан тэрээһиннэр биир былаһааккаҕа ыытыллар кыахтаныахтара.

Афанасий Ноев, СӨ култуура уонна духуобунас сайдыытын миниистирэ: "Дьону сомоҕолуур, түмэр уонна норуоппут култууратын көрдөрөр киин буолуоҕа диэн үлэлии сылдьабыт". 

Бөдөҥ тутуу аны күһүн балаҕан ыйыгар ситэн түмүктэниэхтээх. Бу туһунан Ил Дархан Айсен Николев тохсунньу ыйга эбийиэккэ сылдьан этэн турар.

Айсен Николаев, СӨ Ил Дархана: "Бу эбийиэк күһүн үлэҕэ киириэ диэн эрэллээхпин. Арыллыы дьоро тэрээһинин балаҕан ыйын 27 күнүгэр былаанныыбыт. Саамай сүрүнэ оннооҥҥу диэри үлэ түргэнник эрэ буолбакка үрдүк хаачыстыбалаахтык барыан наада". 

Киин Сайсары күөл кытылыгар турар.

Бырайыак былаанынан биэрэк кытыыта, дьон сылдьарыгар анаан оҥоһуллуоҕа. Ону тэҥэ култуура киинин территорията эргиччи, ол эбэтэр 15 тыһыынча квадратнай миэтэрэ иэннээх сир бүтүүннүү уосастыбаннай сынньанар сиргэ кубулуйуоҕа.