Өрөспүүбүлүкэҕэ бырабыытылыстыба отчуотун мунньаҕа салҕанар

84

Ньурба улууһугар тыа хаһаайыстыбатын миниистирэ Артем Александров салайааччылаах бырабыытылыстыба отчуота ыытыллар. Тустаах бөлөх Малдьаҕар уонна Чуукаар нэһилиэктэригэр үлэлээтэ. Уопсайа 160 тахса киһи сырытта уонна 50 тахса тыа сирин долгутар ыйытыылар киирдилэр. Сүрүн кыһалҕанан бу тайаан сытар нэһилиэктэргэ социальнай эбийиэктэри тутуу уонна тыа хаһаайыстыбатын салаатыгар ыйытыылар буоллулар диэн тыа хаһаайыстыбатын миниистирэ этэр.

Артём Александров, СӨ тыа хаһаайыстыбатын уонна ас-үөл бэлиитикэтин миниистирэ: «Үрдүк таһымҥа кэпсэтии барда, аһаҕастык. Толору уонна чопчу эппиэттэри биэрдэ кэлбит хамаанда».

Оттон экономика миниистирэ салайааччылаах бөлөх Мэҥэ Хаҥалас улууһугар үлэлээтэ. Тустаах оройуоҥҥа бырабыытылыстыба отчуота Баатара нэһилиэгиттэн саҕаланна. Манна олохтоохтор суол өрөмүөнэ өссө тэтимнээхтик оҥоһулларын, сүөһү төбөтүгэр көрүллэр субсидияны, анал байыаннай дьайыыга сылдьар байыастарга дьиэ туттарга туох көмө баарын итиэннэ социальнай гаастааһыны сурастылар.

Пётр Попов, СӨ экэниэмикэ миниистирэ: «Быйыл Баатара нэһилиэгэр гаас ситимэ киириэҕэ. Ону тэҥэ суол оҥоһулла турар».

Петр Попов салайааччылаах бөлөх Мэҥэни таһынан Үөһээ Бүлүү улууһугар үлэлээтэ. Даҕатан эттэххэ, бырабыытылыстыба чилиэттэрэ отчуоту инники былааны кэпсииллэрин таһынан судаарыстыбаннай наҕараадалары туттараллар, араас тэрээһиннэргэ кытталлар. Ол курдук,  Хоро нэһилиэгэр 98 саастаах Аҕа дойду сэриитин кыттыылааҕын огдооботугар Марина Елисеевна Филипповаҕа дойду Президенэ Владимир Путин ыйааҕынан оҥоһуллубут Улуу кыайыы 80 сыла диэн үбүлүөйдээх мэдээли туттардылар.

Ыраах тайаан сытар Булуҥ улууһун олохтоохторугар 2024 сыллааҕы үлэ түмүгүн уонна инники былааннары кытта билиһиннэрэ Саха сирин гражданскай көмүскэл дьыалаларыгар уонна нэһилиэнньэ олоҕор куттал суоһаабатын хааччыйар миниистир Дмитрий Лепчиков тиийдэ. Кини Тикси нэһилиэгин олохтоохторун кытта көрүстэ. 3 чаастан ордук ыытыллыбыт мунньахха дьон үгүс долгутар ыйытыылары биэрдэ. Хоту хоһуун дьоно уу хаачыстыбатын тупсарыыга, маны тэҥэ тиэрдиллэр аһылык хаачыстыбатын хонтуруолга тутарга, авиабилиэт сыанатыгар уонна социальнай эбийиэктэри тутууга сыһыаннаах ыйытыылары биэрдилэр.

Дмитрий Лепчиков, СӨ гражданскай көмүскэл дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга миниистир: «Поставленные вопросы, просьбы перед Правительством, мы обязательно включим в итоговый акт».

Салгыы бырабыытылыстыба отчуотун мунньаҕын Чурапчыга, Муомаҕа, аллараа Халымаҕа, Аллайыахаҕа, Уус Майаҕа уонна Өлөөн улууһугар күүтэллэр. Манна эмиэ олохтоохтор тыын боппуруостары көтөҕүөхтэрэ уонна бэйэ этиилэрин киллэриэхтэрэ.