"Мин төрөөбүт дьиэм" диэн бүтүн өрөспүүбүлүкэтэҕи иккис айар күрэх ыытыллар

Биһиги хампаанньабыт иккис сылын ыытар “Мин төрөөбүт дьиэм” айар күрэххэ номнуо үлэлэр киирэн саҕалаатылар. Быйылгы куонкуруспут ис хоһооно Улуу Кыайыы 80 сылыгар ананар. Бастакы кыттааччыларбыт Сунтаар нэһилиэгин 3 нүөмэрдээх орто оскуолатын үөрэнээччилэрэ уонна учууталлара Кыайыыны уһансыбыт буойун - учууталлар уонна Сэрии оҕолоро диэн видеоролик устан бэлэмнээбиттэр. Аҕа дойду сэриитигэр Сунтаар улууһуттан үлэлии-хамныы сылдьар 112 эдэр учуутал аттаммыта, олортон 49 учуутал уоттаах сэрии толоонугар хорсуннук охтубута.

Туяра Алексеева, "Эйгэ" фольклор бөлөҕүн салайааччыта, эбии үөрэхтээһин педагога: «Видеороликка көстөр Татьяна Егоровна аҕата Егор Егорович Иевлев – буойун учуутал дьиҥнээх олоҕуттан кэпсэнэр ахтыытыгар олоҕуран уһуллубута».

Сунтаар нэһилиэгин 3 нүөмэрдээх орто оскуолата 5 сылын "Иэс, чиэс, ытыктабыл" диэн Аҕа дойду сэриитин, сэриигэ кыттыбыт саха-буойуннарын туһунан билиһиннэрэр бырайыак тэрийэн үлэлэтэр. Бырайыакка учууталлар, оҕолор, төрөппүттэр бэрт көхтөөх кыттыыны ылан сэриигэ сылдьыбыт, кыайыыны уһансыбыт чугас дьоннорун ааттарын үйэтитиигэ матырыйаал хомуйан, тэттик  видеолары усталлар эбит.

Саргылаана Иванова, Сунтаар 3№-дээх орто оскуолатын алын кылаас учуутала: «Хомуллубут матырыйаалы сааһылаан, видеосюжет толкуйдаан сценарий суруллар уонна оҕолор эттэригэр-хааннарыгар иҥэриллэригэр, өйдүүллэригэр сыаллаан сэрии тиэмэтигэр видеоролик уһуллар. Онно кэпсэнэр буойун учууталлар Аҕа дойдуну көмүскүү оҕолорун хаалларан сэриигэ барбыттара».

Бу курдук биһиги биир дойдулаахтарбытыттан Аҕа дойду сэриитигэр сылдьыбыт аҕаларын, эһэлэрин, хос эһэлэрин, Улуу Кыайыны уһансыбыт тыыл бэтэрээннэрин, ыар кэмҥэ улааппыт сэрии оҕолорун туһунан кэпсээннэри күүтэбит. Үлэлэргитин сахалыы, нуучалыы тылынан видеоролик, кэпсээн, хоһоон форматынан ыытыаххытын сөп. Былырыын бастакы күрэхпит төрөөбүт дойду тематыгар анаммыта. Онно 100-тэн тахса араас үлэ киирбитэ. Күрэх лауреатынан хараҕынан бастакы группалаах инбэлиит, Саха сирин суруйааччыларын Сойууһун чилиэнэ, импровизатор-хомусчут, бэйэтэ худуоһунньук идэлээх Любовь Олесова буолбута. Кини 6 кинигэ ааптара, Уус диэн бэйэтэ айбыт хоһоонунан кыттан кыайыыны ситиспитэ.

Любовь Олесова, СӨ суруйааччыларын сойууһун чилиэнэ, импровизатор-хомусчут: «Киһи барыта оонньуур эрээри уустары ким да ахтан ааспат курдук санааммын, кини үлэтин туһунан суруйдаҕым. Лауреат буоллун диэбиттэригэр наһаа долгуйбутум, киһи бөҕөтө кыттыбыт буолуохтаах, ону мин киэммин талбыттара чиэс, үөрүү-көтүү».

Куонкурус сүрүн балаһыанньатын туһунан ГТРК "Саха" сайтан билсиэххэ сөп, үлэлэргитин эмиэ бу сайпытыгар ыытын. Түмүк ыам ыйын 9 күнүн иннинэ тахсан кыайыылаахтар быһаарыллыахтара.