Хаһаайыстыбалаахтарга билигин оту тиэйии үгэнэ

Беларус тыраахтыр икки улахан урулуону тэҥҥэ тутан улахан массыына прицебэр сүөкүүр. Үлэһиттэр элбэх чөмөхтөммүт оту батарар сыалтан сөпкө сааһылаан уураллар. Быһа холоон биир массыынаҕа 32 урулуон от батар. КАМАЗ суоппара Ефим Аркадьев үлэни салайар. Айаҥҥа суолга биир да от саккыраан түспэтин диэн урулуоннары ыга күүскэ быанан баайар.

Ефим Аркадьев, суоппар: «Таастаахха илдьэбит, мантан 3 чаас курдук буолар. 32 рулону күҥҥэ биир рейс тиэйэбит».

Бу Бааҕычча арыыга Нам улууһун 3 нэһилиэгэ сүөһү аһын бэлэмниир. Ол курдук, Модут, Бөтүҥ уонна Хатырык нэһилиэктэрэ. Арыы сир буолан манна от үүнүүтэ үчүгэй. Быйыл эмиэ өлгөмнүк үүнэн Модуттар ордук отторун саха сүөһүтэ хааһына тэрилтэҕэ атыылаан эбии дохуот киллэринэллэр.

Кыстык ортолоон нэһилиэк хаһаайыстыбалаахтара эмиэ арыыттан оту тиэйэн саҕалаатылар. Уопсайынан Модуттарга быйылгы кыстык этэҥҥэ ааһан эрэр. От тиийэр. Барыта 733 төбө сүөһү баар. Маны тэҥэ төрүөх эмиэ саҕаламмыт.

Николай Ядрихинский, Модут нэһилиэгин тыа хаһаайыстыбатын салаатын исписэлииһэ: «Төрүөх тохсунньу ыйтан саҕаламмыта. Билиҥҥи кэмҥэ 26 төрүөхтээхпин. Модут бөһүөлэгэр 3 ЛПХ тутуллан киирдэ».

Өрөспүүбүлүкэ үрдүнэн эмиэ кыстык этэҥҥэ ааһан эрэр. Күн бүгүн уопсайа 155 тыһ 600 тахса төбө сүөһү баар. 3 аҥаар тыһыынчаттан тахса ньирэй төрөөтө. Кулун тутар ыйтан маассабай төрүөх саҕаланар.