ГИМС инспиэктэрдэрэ нэһилиэнньэҕэ сэрэтэр үлэни тэрийэллэр

Бу аахсыйа чэрчитинэн уопсайа 500 киһи кыттыылаах 170 бөлөх тэриллинэ.  Маҥнайгы тэрээһин саҥа үлэлээн саҕалаабыт муус куоракка ыытыллан, бастатан туран инспектордар нэһилиэнньэни кытары сэрэхтээх буолуу туһунан кэпсэттилэр. Чуолаан, төрөппүттэри кытары профилактическай үлэ ыытыллынна.

Наталья Васильева, Дьокуускай куорат олохтооҕо: «Мууска оҕолору көрө-истэ сылдьыахха наада».

Биллэн туран, кыра дьону кытары маннык сирдэргэ сылдьар сэрэхтээх. Онон инспиэктэрдэр оҕолорго "Мууска сэрэхтээх буолуу" кыра кинигэлэри туттардылар. Манна уу эбийиэктэригэр хайдах сэрэхтээхтик сылдьарга быраабылалар сурулла сылдьаллар. Оттон бу аахсыйа элбэх киһини сыһыаран Саха сирин үрдүнэн ыытыллар.

Татьяна Степанова, РФ ЫБММ салалтатын СӨ уу эбийиэктэригэр куттал суох буолуутун хааччыйар салаа салайааччытын солбуйааччы: «Му аахсыйаҕа МЧС эрэ үлэһиттэрэ буолбакка, араас тэрилтэлэр кыттыыны ылаллар. Сүрүн сыала – дьоннор ууттан, муустан сэрэхтээх буолуутун маассаҕа тарҕатыы. Бу кэмҥэ нэһилиэнньэни кытта сэрэтии үлэтэ ыытыллар. Уу эбийиэктэригэр балыксыттары, суоппардары кытта кэпсэтиилэр ыытыллаллар. Оскуолаларга, уһуйааннарга лиэксийэ, викторина ыыталлар».

Биллэн туран, бу тэрээһин чэрчитинэн балыксыттары кытары эмиэ профилактическэй үлэ ыытыллар. Бу күн киин куорат эркин көмүс хатырыктааҕы тутарын сөбүлүүр Алексей Кычкины кытары инпсектордар кэпсэттилэр. Оттон уопуттаах балыксыт этэринэн билигин муус саамай кытаатан турар кэмэ. Ол эрэн сорох сирдэргэ кутталлаах миэстэлэр бааллар.

Алексей Кычкин, балыксыт: «Ол диэки кутталаах, сылаас ууну быраҕаллар, онно сылдьыбаппыт. Ырааҕынан сылдьабыт, муус үчүгэй, халыҥ».

Профилактическай аахсыйа Арассыыйа үрдүнэн бара турар. Бу хайысхаҕа араас хабааннаах тэрээһиннэр ыытылланнар, аахсыйа олунньу ый 23 күнүгэр түмүктэниэҕэ.