Саха төрүт муусука инструменын - кырыымпаны оҥоруу сөргүтүллэр
Семен Иванов - Дьокуускайдааҕы үп-экономика коллеһын дириэктэрин солбуйааччы, үлэтиттэн анаан-минээн отгул ылан кырыымпа оҥоруутун маастар-кылааһыгар кэлбит. Семен Викторович дьиэ кэргэнигэр, чуолаан култуура институтугар үөрэнэ сылдьар кыыһыгар бэлэх оҥорор санааттан саха төрүт музыкальнай инструменын уһаныытын ылыста.
Семён Иванов, Дьокуускайдааҕы үп-экономика коллеһын дириэктэрин солбуйааччы: «Хас биирдии кылы устууканан ааҕан өрөҕүн. Маннык илиигинэн оҥорон таһаарарын, бэйэм илиибинэн оҥорбуппунан киэн туттабын, астынабын».
Маастар-кылааска сүрүннээн орто уонна эдэр саастаах дьон кэлбит. Бары араас идэлээх, дьарыктаах дьон түмсэн алыптаах төрүт дорҕоону таһаарар кырыымпаны оҥорор үөрүйэҕи баһылаатылар. Айталина Баттахова оҕо эрдэҕиттэн кырыымпалыыр эбит.
Кэлин Айталина Хатылаевтар Дьөһөгөй уонна Тэтим ансаамбылларыгар кырыымпаҕа оонньоон киэҥ сиринэн сылдьыбыта. Билигин Айталина оонньуурун ааһан аны кырыымпаны бэйэтэ оҥорор баҕатын толордо.
Айталина Баттахова, коррекционнай оскуола эбии үөрэхтээһиҥҥэ педагога: «Маннык маастар-кылаас биэрэллэриттэн мүлчү туппакка кэлэн үөрэнэ сылдьабын».
Бу үөрэҕи Саха сиригэр биллэр-көстөр тимир ууһа Роман Готовцев- Мындыр Уус салайан ыытар. Роман Ильич "Айар уустар" креативнай индустрия үөрэҕин кыһатыгар ыччаты уһаныыга үөрэтэр-такайар, баай билиитин, уопутун үллэстэр. Ону тэҥэ Саха сирин уустарын түмсүүтүн салайар. Бастаан кини хомус уустарын истэригэр маннык маастар-кылаас ыытан саҕалаан баран, салгыы ону чочуйан, дьоҥҥо табыгастаах гына 3 күннээх гына таҥан бэлэмнээбит.
Роман Готовцев, РФ норуот маастара, норуоттар икки ардыларынааҕы кылаастаах хомус ууһа: «Мин санаабар кырыымпа ыал аайы баар буолан, Сахабыт сирин кэлэр ыччаттарбытыгар маннык дорҕоон баар буоллун диэн баҕа санаалаахпын».
Үөрэх түмүк күнүгэр бары кырыымпаларын ситэрэн төрүт дорҕоону таһааран, барыта табыллан сүргэлэрэ көтөҕүлүннэ. Үөрэнээччилэргэ Сергей Зверев - Кыыл Уола аатынан үҥкүү театырын оркестырын уонна Кыл Саха төрүт дорҕоон бөлөх салайаччылара ыалдьыттаатылар.
Анна Томская, "Кыл Саха" төрүт дорҕоон бөлөх салайааччыта: «Биһи тэриллибиппит 10 сылбыт буолла. Ол саҕана биир уус баар буоллаҕына. Билигин өрөспүүбүлүкэҕэ 42 киһи кыл струнаалаах кырыымпаны оҥоро сылдьар. Бу аҕыйах хонугунан каталог таһаараары сылдьабыт. Бу үлэ уруккатан ыытыллар эрээри. Билигин бары тэҥҥэ түмсэммит үлэлээһиммит үтүө түмүккэ кэллэ».
Онон маннык үөрэх төрүт дорҕоону тыаһатаачылар үксүүллэригэр, саха инструменын оҥорооччулар элбииллэригэр көмөлөөх үтүө дьыала.