Мэҥэ Хаҥалас улууһугар эдэр саҕалааччы фермердэргэ улахан болҕомто ууруллар

7 дьоруой дойдутугар Мэҥэ-Хаҥалас улууһугар 2022 сыллаахха Тыа хаһаайыстыбатын 3 сыллааҕы кирбиитэ биллэриллибитэ. Ол кэмтэн ыла үтүмэн үлэ ыытыллан, быйыл түмүктэр тахсыахтара. Бу эйгэҕэ үлэ бастакы ситиһиилэрэ бааллар. Ол курдук, улуус үгүс элбэх хаһаайыстыбата саҥа тиэхиникэлэннилэр.

Иннокентий Семёнов, Мэҥэ Хаҥалас улууһун тыа хаһаайыстыбатын салалтатын салайааччыта: «Биһиги улууспут сыллата киирсэммит көмө ылабыт. Ол көмөбүтүн хаһаайыстыбаларга ыһыы, сүөһү эбии аһылыгар аналлаах улахан кыамталаах тиэхиникэни ыларга субсидия быһыытынан биэрэбит. Ол курдук быйылгы сылга улахан тиэхиникэлэри ылбыппыт».

Холобура, хаһаайыстыбаларга БТЗ тыраахтар, бульдозер, Агратор диэн ааттаах ыһыы комплекса, дискатердар уонна сухалар ылыллыбыттара. Маны таһынан улууска сири нүөлсүтүүгэ күүстээх үлэ барар. Хорообутааҕы лиманнай уу ситимэ билигин өрөспүүбүлүкэҕэ аатырар. Бу ньыма баар буолан тустаах нэһилиэк хаһаайыстыбалаахтара кураан, от үүнүүтэ суоҕун билбэттэр.

Гаврил Бродников, "Хорообут"  МТ баһылыга: «Үрэҕи халаан уутунан ыытаммыт 1600 га сирбитигэр кураанныырын билбэппит. Сыл аайы хаар уута кэлэр. Бааһынаны иккистээн тилиннэриигэ диэн 140 га эбии үлэҕэ киллэриэхтээхпит».

Маны таһынан бу 3 сыллааҕы үлэҕэ эдэр, саҕалааччы фермердергэ болҕомто ууруллунна. Бу кэм устата үгүс элбэх эдэр дьон хаһаайыстыба тэриннилэр. Холбура, онтон биирдэстэрэ Масаха Мэхээс. Билигин кини аныгы үйэ хотонун тутан, киэҥ араҥаҕа билиҥҥи үйэҕэ хайдах хаһаайыстыбаны тутары билиһиннэрэр.

Мэхээс Масаха, саҕалааччы фермер: «Россельхоз банк эһиил өйүөм диэбитэ. Агрохолдиҥҥа өйүөхпүт диэтилэр уонна ынахтары уларсан көрдөр диэтилэр хайдах гыныахха сөбүн. Агроэксперт диэн тэрилтэни кытта үлэлэһэбин. Онно зоотехниктэр, бэтэринээрдэр бааллар».

Маныаха биир улахан болҕомто ас-үөл бэлитикэтигэр эмиэ уруллар. Биһиги төрүт аспытын Аан дойду таһымыгар таһаарар сыалга, аныгы үйэ тэтимин кытары куйаар ситимин кыттыһыннараллар. Онтон биирдэстэрэ Мэҥэлэр тумус туттар уоллара Вячеслав Романов, норуокка биллэринии Панда Саха буолар.

Вячеслав Романов - Панда Саха, блогер: «Саха сирин аһыттан - тоҥ аһы сэҥээрэн көрөр. Уонна эт быһарбытыгар эт сыатын сэҥээрэн көрөллөр. Тоҕо диэтэххэ бу саамай сөптөөхтүк аһаабыт-сиэбит идэһэ буолар».

Бу курдук араас хайысханы тутуһан, Мэҥэ-Хаҥалас улууһа 3 сыллааҕы үлэтин торумнуур түһүмэҕэр чугаһаата.