Саха сиригэр креативнай индустрия сайдар

Сунтаар улууһуттан төрүттээх Валерия Никифорова ойуулугу оҥорор идэҕэ уһуйулла сылдьар. Анимация эйгэтэ Саха сиригэр саҥа сайдан эрэр кэскиллээх хайысха. Устудьуоннар тустаах бырагыраамаларга каадырдары арааран таҥыыга, режиссураҕа, видеоны таҥыы төрүттэригэр, сценарий суруйуутугар үөрэнэллэр.

Валерия Никифорова, "Айар уустар" креативнай индустрия коллеһын устудьуона: "Бастаан сценарий суруйабыт. Дьэ ол кэннэ үлэлээн саҕалыыбыт". 

Айар уустар креативнай индустрия коллеһа 3 сыллааҕыта бүтүн дойдутааҕы профессиональнай үөрэхтээһин пилотнай бырайыагар киирсэн үлэлиир кыаҕы ылбыта.  2023 сыллаахтан уруккута технология уонна дизайн коллеһа "Айар уустар" диэн ааттанан аныгы кэм ирдэбилигэр сөп түбэһэр наадалаах, эриэккэс исписэлиистэри бэлэмниир. Ол курдук  анимация, программирование, хаартыска, тыас-уус маастарстыбата, реклама, дизайн хайысхаларынан устудьуоннары үөрэтэллэр.

Григорий Яковлев, "Айар уустар" креативнай индустрия коллеһын үөрэтэр салаатын сэбиэдиссэйэ: "2024 сылллаахха бүтэрбит оҕолор 60% үлэнэн хааччылыннылар. Оттон сорохторо үрдүк үөрэххэ салгыы үөрэнэ сылдьаллар. Выпускниктарбыт арааһынай тэрилтэҕэ үлэҕэ киирдилэр. Ол курдук көмүс тэрилтэлэригэр, анимация устуудьуйатыгар уо.д.а. Улахан тэрилтэлэргэ". 

Ити курдук бу саҥа идэлэринэн үлэнэн хааччыллыы көрдөрүүтэ үрдүк. Манна устудьуоннар үөрэнэ да сылдьар кэмнэригэр номнуо үлэ булан үлэлииллэр. Жанна Жиркова звукоператор идэтигэр үөрэнэ сылдьар, ону тэҥэ өрөспүүбүлүкэ бөдөҥ тэрээһиннэригэр өрүү кыттар, үлэлиир.

Жанна Жиркова, "Айар уустар" креативнай индустрия коллеһын устудьуона: "Ыһыахха уонна “Студвеснаҕа” тыас-уус туруорааччы режиссерунан үлэлээбитим".

Креативнай индустрия салаатын сайыннарыыга бастакы исписэлиистэр бааллар.Онтон "Туой арт  туойтан оҥорон хампанньа 4 сыллаҕыта икки эрэ киһи буолан саҕалаан баран билигин уонтан тахса үлэһиттээх тэрилтэ буола үүнүлэр.Тэрилтэ туойтан иһити-хомуоһу, сувенирдары оҥоруунан дьарыктанар, ону тэҥэ дьону кытта үөрэтэллэр. Хампаанньа салгыы үлэтин кэҥэтэр соруктаах.  

Кристина Яковлева, "Туой-Арт" хампаанньа салайааччыта, СӨ туойдьуттарын түмсүүтүн бэрэссэдээтэлэ: "Саха сирэ туойа элбэх. Ол иһин туойунана оҥорон таһаарыыны бэйэбит илиибитигэр ылыахпытын баҕарабыт. Тоҕо диэтэр Арассыыйа иһигэр хостонор туой олох суох. Ким да атыылаабат, хантан да булан ылбаккын. Онон ол өттүгэр сайдыахпытын баҕарабыт. Маны сэргэ уүрэтии чааһын эмиэ сайыннарыы наада".

Креативнай индустрия өрөспүүбүлүкэбит сырьета суох экономиката сайдарыгар төһүү күүс буолуохтаах. Маныаха сонун идеялаах, айар-тутар ис кыахтаах талааннаах дьону,ыччаты, бырайыактары өйөөһүн сүрүн сыал-сорук.