"Кустук" уһуйаан саха тылын, төрүт үгэһи оҕоҕо кыра сааһыттан иҥэрэр
Уран тыл чыпчаала - олоҥхо уһуйаан иитиллэччилэрин толоруутугар. Кырачааннар оллоонноон олорон "Дьулуруйар Ньургун Боотур" айымньыттан быһа тардыыны кэпсииллэр.
Дьокуускай куорат "Кустук" уһуйаана саха тылын, төрүт үгэһин оҕоҕо кыра сааһыттан иҥэриигэ улахан болҕомтону уурар. Маныаха уһуйааччы Сахаяна Ядреева бэйэтэ туспа ньымалардаах. Холобур, оҕо саҥарар, кэпсиир дьоҕурун сайыннарыыга фольклор араас жанрдарыгар уһуйар. Итини сэргэ хас ый аайы алгыс олордуу сиэрин-туомун кырачааннарга оҥорор.
Сахаяна Ядреева, Дьокуускай 26 №-дээх "Кустук" уһуйаан саха тылын уонна фольклорун уһуйааччыта: “Ый аайы, ый саҕаланыытыгар бу ый туохха үөрэтэрий, бэлиэтэ тугуй диэн кэпсиибит. Ый кэс тыллардаах, ол кэс тылларын оҕолор хатылаан сиэр-майгы өттүгэр үөрэнэллэр ”.
Оҕо бары өттүнэн дэгиттэр сайдыыга сүрүн укулааты уһуйааҥҥа ылар. Маныаха "Кустук" саад тылы, култуураны сайыннарыыны кырачааннар доҕурдарын кытта тэҥҥэ дьүөрэлиир. Уруһуйдуулларын сөбүлүүр Сайаана Дмитриева уонна Андриана Михалева тус быыстапкалара арылынна. Манна киистэ кистэлэҥэ айар иэйиини уһугуннарарын сэргэ, имигэс тарбах икки тылынан тэҥинэн саҥарыыны сайыннарар.
Александра Фёдорова, Дьокуускай 26 №-дээх "Кустук" уһуйаан сэбиэдиссэйэ: “Оҕо дэгиттэр өттүнэн сайдарыгар сүрүн болҕомтону уурабыт. Сүрүн үөрэхтээһин бырагырааматын таһынан биэс хайысханан үлэлиир. Ол курдук техническэй, омук тыла, саха тыла уонна фольклора, уруһуй”.
Саха тылын сайыннарыы уонна харыстааһын судаарыстыбаннай бырагыраама чэрчитинэн ыытыллар. Бу сорук олоххо киириитигэр бары хайысханы хабан үлэ барар. Биллэн турар, кыра саастаах оҕолорго тылы иҥэрии сүрүн болҕомтоҕо. Маныаха араас бырайыактар истэринэн чинчийиилэр ыытыллаллар. Холобур, гуманитарнай чинчийэр институт учуонайдара 14 улууска уонна Дьокуускай куоракка оҕо сахалыы саҥарар таһымын чинчийэр үлэни ыыттылар. Манна көстүбүтүнэн 47 %-ра төрүт тылынан холкутук кэпсэтэллэр.
Вилюяна Никитина, гуманитарнай чинчийии институтун билим үлэһитэ: “Ити чинчийдибит аны билигин сүбэни-аманы оҥоруу диэн түһүмэх бара турар. Билигин оҥорон, онтон бигэргэтэн баран окуолаларга, уһуйааннарга, улуус салалталарыгар, үөрэх министиэристибэтигэр ыытыахтаахпыт”.
Сүрүн сүбэ төрөппүккэ уонна уһуйааччыга туһаайыллыа. Оттон төрөөбүт тылы харыстааһыҥҥа кэскиллээхтик, киэҥ далааһыннаахтык үлэлиир "Кустук" курдук уһуйааннар судаарыстыбаннай бырагыраама олоххо киириитигэр олук буолаллар.