Кыайыы Знамята Горнай улууһугар
Горнай улууһа уонна киин куорат силбэһэр ытык сиригэр Улуу Кыайыыны уруйдуур тэрээһин саҕаланар. Өбүгэ сиэринэн хаһаайыттар алгыстаах алаадьынан кэлбит ыалдьыттары күндүлүүллэр, айах туталлар. Оттон бу күн Хаҥалас оройуона Кыайыы былааҕын Горнай улууһугар туттарда.
Үөрүүлээх быһыыга-майгыга Кыайыы сүрүн бэлиэтин улуус баһылыга Никита Андреев Хаҥалас оройуонун баһылыгын солбуйааччытыттан Юрий Никифоров илиититтэн тутар. Оттон Хаҥалас улууһугар Кыайыы эстафетата олунньу ый 7 уонна 11 күнүгэр ааһан, оройуон нэһилиэктэрин барытын кэрийбитэ.
Юрий Никифоров, "Хаҥалас улууһа" МТ баһылыгын солбуйааччы: “Кыайыы былааҕын нэһилиэнньэ бэйэ баҕа өттүнэн олус көхтөөхтүк көрүстэ. Оскуолаларга линейка, ол кэннэ таһырдьа туспа нэһилиэк дьонун кытта көрсүһүүлэри оҥордубут”.
5 хонук устата Кыайыы былааҕа улуус саамай түгэх Иһит дэрибинэтиттэн саҕалаан Төхтүргэ тиийэ айаны көрсөн, ытык Горнай улууһун булла. Манна эмиэ сиэр быһыытынан айан салҕаныа.
Никита Андреев, : “Горнай улууһун нэһилиэктэрэ Арҕаа Хаҥалас улууһа буоларбытынан историяны өйдүү-саныы сылдьабыт, киэн туттабыт. Кыайыы былааҕын эстафетатын чэрчитинэн Аҕа дойдуну көмүскээччи сылын үөрүүлээх быһыыга-майгыга арыйыахпыт, итини сэргэ Кыайыы 80 сылын тэрээһиннэрэ саҕаланыахтара”.
Горнай улууһун кырыныыссатыттан Кыайыы былааҕа улуус иһигэр киирэн айана салҕанан, аан бастакы дэриэбинэни булар. Манна эмиэ үгэс быһыытынан сулууспалаах дьон былааҕы олохтоох култуура киинигэр киллэрэн, Улуу Кыайыыны уруйдуур тэрээһин саҕаланар.
Одуну нэһилиэгин олохтоохторо эдэрдиин эмэнниин, оннооҕор уһуйаан саастаах оҕолор бары тоҕо анньан кэлбиттэр. Саала иһэ тобус толору киһи. Кыайыы былааҕын уруйдаан, улуус баһылыга эҕэрдэ тыл этэн, салгыы Аҕа дойду сэриитин туһунан дьүһүйүү көрдөрүллэр.
"Аан маҥнайгынан Кыайыы Знамятын Одуну нэһилиэгэ тутта. Бу кэннэ улуус аҕыс нэһилиэгэр айанныаҕа", - Анастасия Добрянцева, корреспондент.
Оттон манна даҕатан эттэххэ, Горнай улууһун олохтоохторо Улуу Кыайыыны уһансыыга улахан кылааттарын киллэрбиттэрэ. Оройуонтан 900 киһи сэриигэ аттаммыттара. Онтон бу Одуну нэһилиэгиттэн 158 эр киһи сэрии толоонугар туруммуттара.
Прасковья Корякина, Одунутааҕы "Албан аат" түмэл үлэһитэ: “Онтон 88 сэрии уоттаах толоонугар охтубута. Төннүбүттэр ахсааннара 64. Кэлэн баран кинилэр эйэлээх олоҕу уһансыыга стахановец, үлэ ударнига буолан үлэлии-хамсыы сылдьыбыттара”.
Аҕа дойду сэриитигэр эйэлээх халлаан иһин бэйэлэрин олохторун толук уурбут дьоммутун итиэннэ ытыктыыр бэтэрээннэрбитин, сэрии оҕолорун үйэтитэр сыаллаах Кыайыы былааҕын эстафетата салгыы Горнай улууһуттан Бүлүү оройуонугар тиийиэҕэ.