Улуу Кыайыы знамята Нам улууһун нэһилиэктэринэн сырытта

Өрө көтөҕүүлээх дорҕоонунан доҕуһуоллатан Модут сирэ-уота Кыайыы знамятын көрсөр. Нэһилиэк спорт саалатыгар ытык кырдьаҕастары кытта кэлэр кэнчээри ыччат тоҕуоруһа муһунна. Улуу кыайыы бэлиэтин хас биирдии мустубут долгуйа көрүстэ.

Ефим Гоголев, Модут нэһилиэгин баһылыга: «Кыайыы знамята кэлбитигэр үөрдүбүт. Бу Кыайыы знамята төһүү күүс буолар. Бу тэрээһинтэн саҕалаан олус элбэх тэрээһин салҕанаары турар: араас кинигэ тахсыыта, пааматынньыктар сөргүтүүлэрэ, оҕолору үөрэтээһин».

Кыайыы знамята эйэлээх олох туһугар олохторун толук уурбут хорсун дьон ааттарын үйэтитэргэ ордук улахан суолталаах. Аҥардас бу Нам улууһуттан Аҕа дойду сэриитигэр 2651 киһи ыҥырыллан барбыт. Мантан 1100 эрэ дойдутугар эргиллэн кэлбит. Сыллата уоттаах сэрии алдьархайын эттэринэн-хааннарынан билбит дьоммут аҕыйаан иһэллэр. Сэрии кыттыылаахтарын ааһан сэрии оҕолоро кытта аҕыйаатылар. Кинилэртэн биирдэстэрэ, Модут нэһилиэгин олохтооҕо Игнатий Иванович Кутуков буолар. 83-с хаарыгар үктэммит ытык кырдьаҕас дойдубутугар алдьархай ааҥнаан турбут кэмигэр күн сирин көрбүт, оттон оҕо сааһа сэрии кэннэ дойдубут саҥа атаҕар туран эрэр кэмигэр ааспыт. Онон Кыайыы кэлбит сыаната олус улахан диэн этэр. 

Игнатий Кутуков, Модут нэһилиэгин олохтооҕо, сэрии оҕото: «Биһи экономикабыт кыахтаах буолан Германия оҥорон таһаарыытын баһыйан, элбэх сэрии сэбин оҥорон, улахан суолталаах Кыайыыны ситиһэн турабыт. Улахан Кыайыы, суолтата билигин даҕаны намтыы илик».

Улуу Кыайыы сүрүн бэлиэтэ номнуо 11 улууһу кэрийэн Эҥсиэли хочотугар кэллэ. Эстафета ахсынньы 28 күнүгэр Мэҥэ Хаҥалас улууһуттан саҕаламмыта. Нам улууһугар Кэбээйи оройуона туттарбыта.

Егор Протопопов, Нам улууһун баһылыгын социальнай боппуруостарга солбуйааччыта: «Быйылгы сылы биһиги улууспут баһылыга Юрий Иннокентьевич Слепцов Кыайыы сылынан биллэрдэ. Бары хайысхаҕа кыайыы буолуохтаах, кытаатыахтаахпыт, үлэлиэхтээхпит-хамныахтаахпыт диэн сыаллаах-соруктаах. Уонна үгүс элбэх тэрээһиннэр, былааммыт ылыллан үлэбитин саҕалаатыбыт».

Онон Кыһыл знамя Улуу кыайыы 80 сыллаах үбүлүөйүн саҕалыыр биир бастакы тэрээһин буолар. Кыайыы знамята бары улууһу кэрийэн ыам ыйын 9 күнүгэр киин куоракка кэлиэҕэ.