Саха сирин эдэр учуонайдара доруобуйаҕа туһалаах эбиликтэри айан таһаарыынан дьарыктаналлар

Эдэр химик учуонайдар Владислав Михайлов уонна Игорь Слепцов доруобуйаҕа туһалаах эбиликтэри айан таһаарынан дьарыктаналлар. Кинилэр үлүйүүнү тохтотор биопрепарат оҥоруутун түмүктүүр түһүмэҕэр сылдьаллар. Бэс мас иҥнэлэригэр баар пенетол диэн эттиги саха сирин тымныытыттан харыстанарга туһаныахха сөбүн дакаастаабыттар. Уонна ону күннээҕи олоххо туһаныыны киллэрэллэр. 

Владислав Михайлов, криолитозона биологическай кыһалҕаларын институтун билим үлэһитэ: «Пенетол, мио-инизитол диэннэр. Кинилэр дьайыылара – ууну бэйэлэригэр сыһыараллар. Уу мууһурар температуратын намыһах оҥороллор. Ону Саха сиригэр косметологияҕа туттар былааннаахпыт».

Ол эбэтэр саҥа арыйыы сирэй үлүйүүтүн төһө эмэ тохтотуохтаах. Тыйыс кыһыннаах сиргэ тоҕоостоох арыйыы Ил Дархан граанын сүүйэн, чинчийии тэтимирбит. 50 кыраадыска холоон көрүүнү үрдүк көрдөрүүлээхтик ааспыт, өссө  киһи тириитин уунаҥнас гынара биллибит. Билигин докумуоннааһын үлэтэ барар.

Игорь Слепцов, криолитозона биологическай кыһалҕаларын институтун билим үлэһитэ: «Патеҥҥа сайаапка ыыпыппыт. Сотору бэрэбиэркэ ааһыахпыт, ол кэннэ сертификация ааһыахпыт».

Бу лаборатоияҕа тахсар эбиликтэр барыта Саха сирин үүнээйититтэн итиэннэ кыылыттан-сүөлүттэн оҥоһуллаллар. Владиславтаах Игорь өссө биир үлэлэспит  эбиликтэрэ Бетукладин. Бу ковид саҕана киэҥник тарҕаммыт препарат. Учуонайдар туос уонна лабыкта туһалаах эттиктэрин сыстыганнаах ыарыыны кыайарга туһаналлар. Онон эдэр учуонайдар нэһилиэнньэ чэгиэн буоларыгар туһулаан чинчийии ыыталлар.

Владислав Михайлов, криолитозона биологическай кыһалҕаларын институтун билим үлэһитэ: «Кэнники арыйыыларбыт, үлэбит сыала-соруга – Саха сирин уонна Арассыыйа дьонугар доруобуйаларын тупсараары».

Эдэр дьон айан таһаарыылара киэҥник туһаныыга сыыйа-баайа киирэр. Ол курдук Эпсорин диэн таба муоһуттан оҥоһуллубут БАДы сэниэ эбэр утахха булкуйан, хамаҕатык атыыга барар. Итини сэргэ Дьокуускайдааҕы килиэп кэмбинээтэ лабыкта уонна бетулин эбиликтээх килиэптэри буһарар. Ити курдук билимҥэ киэҥ хардыыны оҥорор эдэр учуонайдар үлэлэрин түмүгүнэн судаарыстыбаннай  бириэмийэни ылары ситистилэр.