Саха сиригэр бэдэрээлинэй бырайыак чэрчитинэн 8 бөдөҥ спорт эбийиэктэрэ үлэҕэ киирдилэр
Кэнники 5 сыл устата Саха сиригэр спорт эбийиэктэрин, саалалары, комплекстары, бассейнары тутуу көхтөөхтүк барда. Улуустарга, куораттарга модульнай саалалартан саҕалаан бөдөҥ комплекстарга тиийэ араас тутуулар ыытыллыннылар, спортинвентарынан хааччыллыы эмиэ таһымнаахык тэрилиннэ. Маныаха 2018 сылтан тэҥнээтэххэ, өрөспүүбүлүкэбитигэр спордунан, физкультуранан дьарыктанааччы ахсаана балтараа төгүл үрдээбитэ бэлиэтэннэ. Чуолаан оҕо спордун сайдыытыгар киин болҕомо ууруллар.
Леонид Спиридонов, СӨ физическэй култуура уонна спорт миниистирэ: «Оҕолор спартакиадалара сөргүтүлүннэ өр сыллаах тохтобул кэнниттэн. Улахан ситиһиибит буолар. Билигин үөрэҕирии министиэристибэтэ күрэхтэһиини сөргүтэннэр оҕолорго үһүс төгүлүн быйыл ыытан саҕалыахтара».
Ааспыт 2024 сылга Азия оҕолоро норуоттар икки ардыларынааҕы спортивнай оонньуулар үрдүк таһымҥа ыытыллан, кэнчээри ыччаппыт бэлэмнээҕин, кыахтааҕын көрдөрдө.
Соторутааҕыта Дьокуускайга Звезднай түөлбэҕэ сабыылаах хаҥкылыыр сир аһыллыбыта. Бу спорт эбийиэгэ "Спорт-норма жизни" федеральнай бырайыагы түмүктүүр тутуунан буолла. 5 тыһыынча квадратнай миэтэрэ иэннээх компекс бастакы сылга 840 тахса оҕону хабар соруктаах. Манна барыта 8 көрүҥүнэн дьарык ыытыахтара.
Үүммүт 2025 сылга Саха сирин спортивнай олоҕо эмиэ оргуйан олоруо. Бүтүн дойдутааҕы спортивнай үҥкүү, сүүрүү күрэхтэрэ, пауэрлифтиҥҥа көрбөттөр чемпионаттара, дроҥҥа, дартска өрөспүүбүлүкэтээҕи күрэхтэһиилэр ыытыллыахтара. Сыл саамай бэлиэ спортивнай түгэнинэн "Манчаары оонньуулара" спорт национальнай көрүҥнэрин Спартакиадата буолуоҕа. Күрэхтэһии Таатта улууһугар ыытыллаҕа. Маныаха улууска Спартакиаданы көрсө спортивнай эбийиэктэри тутуу салҕанар.
Татьяна Николаева: Быйыл "Мин спорду талабын" аҥардас биир федеральнай бырайыак иитинэн өрөспүүбүлүкэ үрдүнэн 3 эбийиэк тутуллан үлэҕэ киирэрэ күүтүллэр. Ол курдук Таатта улууһун Чөркөөҕөр, Ньурба улууһун Чаппанда нэһилиэгэр модульнай спортивнай сааллары тутуохтара уонна Бүлүү куоратыгар аныгы технологиянан өйдөөх спортивнай былассаакканы үлэҕэ киллэриэхтэрэ.