Мэҥэ Хаҥалас улууһун "Хорообут" хаһаайыстыбата кыстыгы этэҥҥэ ортолотто

Эбии аһылыкка киириэх иннинэ, хороҕор муостаахтар Мэҥэ Хаҥалас иҥэмтэлээх отун сиэн кэбинэллэр. Ол курдук, тустаах хаһаайыстыбаҕа 140 ыанар ынаҕы, маныаха 355 сыспай сиэллээҕи туталлар. Билигин Хорообуттар өрөспүүбүлүкэҕэ биир тарбахха баттанар племенной хаһаайыстыбылар.

Наталья Васильева, "Хорообут" хаһаайыстыба зоотехнига: «2017 сылтан племсвидетельство ыламмыт репродуктор буоламмыт үлэлээн-хамсаан олоробут. Билигин 400-тэн тахса сүөһүлээхпит. Племҥа 100 төбө киирэн турар. Биирдии ынахтан 3100-тэн тахсаны ыан олоробут. Искусственнай сиэмэбит уонна осеменаторбыт күүстээхтик үлэлэһэр, Михаил Михайлович Егоров. Билигин 4 ыанньыксыттаахпыт».

Чахчы, манна бастыҥнар үлэлииллэр. Холобура, манна 2023 сыл түмүгүнэн Өрөспүбүлүкэтээҕи "Үлэ киһитэ" куонкурус лауреата, "Үлэ албан" аата мэтээл хаһаайката, 40 сыл устата биир миэстэттэн ончу халбарыйбакка үлэлии сылдьар Марина Васильева ыанньыксыттыыр. 

Марина Васильева, "Хорообут" хаһаайыстыба ыанньыксыта: «Мин 1982 сыллаахха хомсомуол путевкатынан Хорообут орто оскуолатын бүтэрэн баран үлэлии тахсыбытым. Онтон ылата күн-бүгүнүгэр дылы үлэлээн кэллим. Баччааҥҥа дылы биир тэрилтэҕэ үлэлии сылдьабын. Иллэрээ сыл “Үлэ киһитэ” куонкуруска кыттан кэлбитим. Быйыл Москваҕа соһуччу баран кэллим».

Хорообуттар сүөһү эбии аһылыгын олоххо киллэрии бырагыраама чэрчитинэн сири кытары күүскэ үлэлииллэр. Ол сыалга улуус өттүттэн үгүс көмө оҥоһуллубут.

Иннокентий Семёнов, Мэҥэ Хаҥалас улууһун тыа хаһаайыстыбатын салалтатын салайааччыта: «Биһиги улууспут сыллата киирсэммит көмө ылабыт. Ол көмөбүтүн хаһаайыстыбаларга ыһыы, сүөһү эбии аһылыгар аналлаах улахан кыамталаах тиэхиникэни ыларга субсидия быһыытынан биэрэбит. Ол курдук быйылгы сылга улахан тиэхиникэлэри ылбыппыт».

Бу курдук хас да хайысханан тутуһан үлэлээн, Хорообуттар бастыҥнар ахсааннарыгар киирэллэр. Улууска тыа хаһаайыстыбатын сайыннараллар.