Бүтүн дойду үрдүнэн Зарница байыаннай-патриотическай оонньуу бастакы түһүмэҕэ саҕаланна

Сэбиэскэй сойуус дьоруойун Федор Попов аатын сүгэр оскуола үөрэнээччилэрэ бастакытын Зарница оонньуутугар кыттарга бэлэмнэнэллэр. Бастакы түһүмэххэ туһааннаах сайтка киирэн бэлиэтэнэллэр, ол кэннэ дьэ эт-хаан тургутуутун ааһыахтара. 20-с оскуола байыаннай-патриотическай хайысхалаах буолан маннык тэрээһиннэргэ куруук бэлэмнээхтэр. Ааспыт сылтан үөрэх кыһатын иһинэн Юнармия хамсааһына үлэлээн саҕалаабыт.

Сергей Матвеев, Дьокуускайдааҕы 20-с №-дээх оскуола "Юнармия" хамсааһынын салайааччыта: «Билигин оскуолабытыгар 377 юнармеец баар. Куораттааҕы этаптарга кыттабыт уонна оскуолабытыгар эмиэ быланнаахпыт. Онон ый аайы ыытабыт».

Юнармеецтар эт-хаан өттүнэн эрэ буолбакка, өй-мэйии өттүнэн эмиэ сайдаллар. Маны тэҥэ биир сүрүн миссиялара дьоҥҥо көмө-өйөбүл буолааһын. 11 кылаас үөрэнээччитэ Денис Федоров бу хамсааһын оскуолаҕа киириэҕиттэн патриотическай санаанан салайтаран кыттыспыт. Кини үөрэнэр оскуолата дьоруой аатын сүгэринэн киэн туттар. Маныаха бэйэтэ Федор Поповка анаан хоһоон суруйбут, ону биһиги устар бөлөххө ааҕан иһитиннэрдэ.

Денис Фёдоров, Дьокуускайдааҕы 20-с №-дээх оскуола 11 кылааһын үөрэнээччитэ: «Мин киэн туттар киһим – Саха сирин чулуу уола. Саха сирин киэн туттуута. Саха сирин күүстээх санаата. Сүөдэрбит, дьоруойбут. Ийэ дойду иһин охсуспут, Аҕа дойду сэриитигэр. Эйэ иһин турууласпыт - Сүөдэрбит, дьоруойбут. Эдэр ыччат махтала, эдэр ыччат холобура. Саха туйгун уола – Сүөдэрбит, дьоруойбут».

Оскуолаҕа биллэн турар хас биирдии үөрэнээччи Федор Попов аатын, кини кимин эҥкилэ суох билэр. Маныаха үөрэх кыһатыгар сыллата араас тэрээһиннэр ыытыллаллар. Аҕа дойду көмүскээччитин күнүн, Улуу Кыайыы күнүн манна киэҥ далааһыннаахтык бэлиэтииллэр. Итиэннэ киин куоракка, өрөспүүбүлүкэҕэ ыытыллар байыаннай-патриотическай күрэхтэри эмиэ көтүппэттэр.

Андрей Новоприезжий, Дьокуускайдааҕы 20-с №-дээх оскуола дириэктэрэ: «Быйыл элбэх тэрээһин буолуохтаах Кыайыы 80 сылыгар Федор Поповка анаммыт стенд, мусуой, юнармеец кылааһын арыйдыбыт уонна элбэх тэрээһин күүтэр».

Оттон бу Зарница оонньуугар туһааннаах оскуола үөрэнээччилэрэ быйыл бастакыларын кыттыахтара.  Оскуола юнармеецтара үөрэх кэмигэр эрэ буолбакка, иллэҥ кэмнэригэр эмиэ Зарницаҕа баар буолар тургутууларга, түһүмэхтэргэ бэлэмнэнэллэр. Зарница 2.0 байыаннай патриотическай оонньуу оскуолатааҕы түһүмэҕэ олунньу 3 күнүттэн саҕаланна, ол кэнниттэн кулун тутар 1 күнүттэн муниципальнай, салгыы муус устар саҥата өрөспүүбүлүкэтээҕи түһүмэх ыытыллыа.