Дьокуускай - Аллараа Бэстээх хайысханан 40 туоннаҕа диэри сырыы көҥүллэннэ
Мууһу халыҥатыы үлэтэ кыһын устата тохтообот. Суол үлэһиттэрэ тиһигин быспакка өрүс суолун оҥороллор. Билигин улахан кыамталаах массыыналар сылдьар буоланнар, сотору-сотору муус алдьанар диэн этэллэр.
Александр Давыдов, "Бүлүү" суол салалтатын эксплуатацияҕа салаатын салайааччыта: «Биһиги эбии балаһабытынан уу кута сылдьабыт, суолун тэҥнии сылдьабыт. Көҥүлэ суох улахан массыыналар ааһаннар алдьаныы барар. Маннык үлэ мэлдьи бара турар».
Оттон бу олунньу 1 күнүттэн улахан массыыналарга сырыы көҥүллэннэ. Онон билигин Дьокуускай - Аллараа Бэстээх хайысханан быыстала суох айан. Маныаха 40 туоннаҕа диэри уйуктаах тимир көлөҕө туһааннаах хайысханан сырыы болдьохтон хойутаан арылынна. Оттон аны туран киин куораты илин эҥэри уонна хоту улуустары кытта ситимниир биир сүрүн кыһыҥҥы өрүс суола өр турбат туруктаах.
Арктика улуустарыгар атыы-эргиэн үлэтин торумнуур хампаанньа ыраах тайаан сытар улуустары аһынан-үөлүнэн, олоххо-дьаһахха наадалаах малынан-салынан хааччыйар биир сүрүн тэрилтэ. Күн бүгүн кыһыҥҥы суолунан 800 тахса туонна таһаҕас тиэрдилиннэ.
Иннокентий Петров, Арктика улуустарыгар атыы-эргиэн үлэтин торумнуур хампаанньа дирэктэрин солбуйааччыта: «Кыһыҥҥы суолга бэлэмнэнии барар турар. 5 сылаас КАМАЗтар үлэҕэ сылдьар уонна ол үрдүнэн чааһынайдары ылан үлэлэтэ сылдьабыт».
Таһаҕаһы тиэрдии былаан быһыытынан баран иһэр эрээри, кэккэ улуустарга күн-дьыл туругуттан күчүмэҕэйдэр үөскээтилэр. Ол эрэн, үлэһиттэр этэллэринэн маннык көстүү сыллата буолар. Онон хайдах баҕар усулуобуйаҕа үлэлииргэ күһэллэллэр.
Анатолий Шадрин, Арктика улуустарыгар атыы-эргиэн үлэтин торумнуур хампаанньа кыһыҥҥы өрүс суолунан таһаҕаһы тиэрдэр салаатын салайааччыта: «Нэдиэлэттэн тахса Булун улууһугар буурҕа түһэн суоллары сабан кээстэ. Күн-дьыл тупсарын күүтэллэр».
Кыһыҥҥы өрүс суолунан туһааннаах тэрилтэ барыта холбоон 5 тыһ тахса туонна таһаҕаһы тиэрдиэхтээх. Онон кинилэргэ билигин хас биирдии күн былдьаһык. Оттон Дьокуускай Аллараа Бэстээх хайысханан кыһыҥҥы өрүс суола быһа холоон муус устар ый ортото сабыллара сабаҕаланар.