Улуу Кыайыы 80 сылыгар бэлэмнэнии киэн далааһыннаахтык бара турар

Улуу Кыайыы 80 сылын бэлиэтиир өрөгөйдөөх күммүт чугаһаата. Өрөспүүбүлүкэ үрдүнэн бэлэмнэнии үлэтэ номнуо саҕаламмыта.  Араас хабааннаах тэрээһиннэр, аахсыйалар ыытыллаллар. Маны таһынан Саха сиригэр Кыайыы волонтердара күүс-көмө буолаллар. Үлэ хас да хайысханан барар.

Тимур Егоров, "Кыайыы волонтёрдара" хамсааһын Саха сиринээҕи салаатын салайааччыта: «Көлүөнэлэр ситимнэрэ диэн туспа хайысхалаахпыт Кыайыы волонтердарыгар. Ол иһинэн бэтэрээннэрбитин кытта үлэлэһэбит. Хомойуох иһин бэтэрээннэрбит сылтан сыл аҕыйаан иһэллэр. Билигин Саха сиригэр 9 бэтэрээн хаалла. Хас биирдиигэ улахан болҕомто уурабыт».

Анастасия Слепцова устудьуон. Кини анаан-минээн былырыын Кыайыы волонтердар хамсааһыннарыгар киирбитэ. Үөрэҕин кэннэ доҕотторун кытта волонтердар сүрүн ыстаптарыгар кэлэн, ыйдааҕы былааннарын, үлэлэрин кэпсэтэллэр. Бу хамсааһыҥҥа киириэхпиттэн элбэх доҕоттордоннум, саҥаны биллим диэн этэр.

Анастасия Слепцова, Кыайыы волонтёра: «Биһиги волонтердуубут, үлэлиибит. Мин доҕотторбун барытын ыҥырбытым».

Кыайыы волонтердара Дьокуускай куоракка эрэ буолбакка, улуустары барытын хабан үлэлииллэр.  Араас көрсүһүүлэри, оскуолаларга кылаас чаастары, аһаҕас кэпсэтиилэри ыыталлар. Маны таһынан Кыайыы сайта үлэлиир. Бу сайтка хас биирди олохтоох киирэн, Кыайыыга сыһыаннаах ахтыыларын, суруктарын, хаартыскаларын ыытыан сөп.

Күн бүгүн Кыайыы волонтердар хамсааһыннарыгар түөрт тыһыынчаттан тахса киһи баар. Билигин да бу хамсааһыҥҥа киириэн баҕалаахтар элбэхтэр, суруттарыы барар турар.

Николай Бурцев, Кыайыы волонтёра: «Кыайыы волонтера буолар санаалаах оҕолор элбэхтэр. Кинилэр кэлэн күүс-көмө буола сылдьаллар».

Улуу Кыайыы 80 сылын бэлиэтиир өрөгөйдөөх күммүт чугаһаата. Итиэннэ Саха сиригэр Ийэ дойдуну көмүскээччи сыла. Ил Дархан Айсен Николаев ыытыллар үлэни, концепцияны бигэргэтэн турар, онон үлэ биир ситимнээхтик барыаҕа.