Мэҥэ-Хаҥалас улууһугар "Алаас-Ас" кээпэрэтиип таһаарыылаахтык үлэлиир
Эбээлии ис сүрэхтэн таптайан, хас биирдии бородууксуйаҕа дууһаларын ууран туран, "Хорообут-Астар" арыыларын бу курдук "бүөбэйдээн" таһаараллар. Ол да иһин буолуо Хорообуттар арыылара улуус эрэ иһигэр буолбакка, бүтүн өрөспүүбүлүкэ үрдүнэн минньигэһинэн аатырда.
Оттон маннык бородууксуйа биллэн туран, бэриниилээхтик, үтүө суобастаахтык үлэлии сылдьар дьонтон тахсар. 23 сыл устата бу эйгэҕэ үлэлии сылдьар Дария Борисова билигин үлэлииргэ усулуобуйа тупсаҕай буолан, бородууксуйабыт хаачыстыбата да үрдүк диэн маастар киһи үлэ хаамыытын кэпсиир.
Дария Борисова, "Алаас-ас" ТХПК лаборана: «Эргэ баҕайы собуокка үлэлии сылдьыбыппыт. 1,5 сыл буолла саҥа собуокка киирбиппит. Наһаа үчүгэй, сылаас, киһи үөрэ-үөрэ үлэлиэн курдук».
Чахчы, манна үлэһиттэргэ усулуобуйа барыта тэриллибит. Ол курдук күөх уматык суох сиригэр газгольдернай ититии ситимэ киирэн, сыах сып-сылаас, чахчы киһи эрэ үөрэ-көтө үлэлиир.
Светоний Шестаков, "Алаас-ас" ТХПК бэрэссэдээтэлэ: «Иккис сылбытын кыстаан эрэбит. Ыйдааҕы оросхуот 20-тэн тахса тыһ. этэ. Чоҕунан отторбут буоллар оросхуоппут өссө элбиэ этэ. Тыа хаһаайыстыбатын министиэристибэтэ көмөлөһөн турораммыт үлэ чэпчээн турар. Быйыл 2024 сыл түмүгүнэн 518 туонна үүтү переработкалаатыбыт. Онтон 472 туонна хаһаайыстыбабыт киэнэ».
Былаан туолан, бачча элбэх үүт үрдүк хаачыстыбалаах оборуудабанньаҕа астанар. Холобура, 23 сыллаахха биир күүҥҥэ 2 туоннаны астыыр саҥа тэриллэр тураннар, материальнай хааччыллыы толору саҥардыллыбыт.
Оттон манна даҕатан этэр буоллахха, бу кээпирэтииби тыа хаһаайыстыбатын үтүөлээх үлэһитэ Прокопий Плотников тэрийбитэ. Билигин кини сыдьааннара аҕаларын дьыалатын салҕыыллар. Күн бүгүн тэрилтэҕэ 6 киһи үлэлиир. Сүрүн үлэ торума - үрүҥ илгэни астааһын.
Гаврил Бродников, "Хорообут" МТ баһылыга: «Быйылгы сылга боломуочуйа киирэн үүппүт өссө эбиллиэхтээх. Быйыл 400-тэн тахса туоннаны туттаран, соҕотуопкалаатыбыт».
Оттон тэрилтэ билигин былаана киэҥ. Өссө саҥа обруудабанньа ылан, үрүҥ ас бородууксуйатын көрүҥүн элбэтиигэ үлэлэһиэхтэрэ.