Быйыл олунньу дьыбардаах уонна сытыы тыаллаах буолара күүтүллэр

Олунньу ый саҥата хайдаҕый да бүтүүтэ эмиэ оннук буолар, бу күннэргэ былыта суох ылааҥы күннэр турар буоллахтарына, саас эрдэ кэлэр диэн норуот муудараһа этэр. Ааспыт өрөбүллэргэ ый бастакы чыыһылаларыгар тымныы күн-дьыл туран баран, бэнидьиэнньиктэн саҕалаан хаардаан кэм салгын температурата өрө таҕыста. Ол эрээри күүстээх сытыы тыал аргыстанна. 

Дьокуускайга сынньалаҥ паркатыгар саҥа дьыллааҕы харыйаны хомуйдулар. Куорат олохтооҕо Иван Гоголев күннэтэ паркаҕа кэлэн салгын сиибин, хаамабын диэн этэр. 87-с хаарын уулларан эрэр ытык кырдьаҕас, олунньу тымныйара буолуо диэн сабаҕалыыр.

Иван Гоголев, Дьокуускай олохтооҕо: «Күһүн итиппитэ, онон былыргы оҕонньоттор этэллэринэн, онтукатын иэстэһиэхтээх. Олунньу тымныйара буолуо».

Бу күннэргэ Лаптев муоратыттан арктическай циклон тахсан чуолаан Анаабыр улууһугар сөкүүндэҕэ 28 миэтэрэ тиийэр күүстээх тыалы аҕалла. Бу сис былыт Саха сирин арҕаа улуустарыгар тыала, хаары аҕалла.

Саргылаана Никитина, Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: «Бу циклон Өлөөн, Бүлүү бөлөх оройуоннарынан Лиэнскэйгэ ааһыаҕа. Онон өрөспүүбүлүкэ арҕаа аҥарыгар хаардаах тыаллаах күн-дьыл сабаҕаланар».

Үүнэр икки сууккаҕа үгүс улуустарга эмиэ тыаллаах-хаардаах күн-дьыл турара күүтүллэр. Маныаха ордук билигин ас иҥэмтиэтэ аҕыйаан, киһи этэ-сиинэ мөлтүүр. Онон бу ыйга дьаҥ тарҕанар. Билигин Саха сирин үрдүнэн ОРВИ, грипп ыарыыта элбээн турар.

Савелий Неустроев, СӨ 3№-дээх балыыһатын фельдшера: «Билигин ОРВИ кыратык үрдээн турар. Ковид уонна грипп биирдиилээн баар».

Онон ыарыыттан эрдэттэн харыстанар наада. Дьокуускайга олунньу 1 күнүттэн саҕалаан 3 ыйдаах санитарнай ырааһырдыы үлэтин ыытыахтара. Туох баар хаары, тоҥмут бөҕү-саҕы тиэйии-таһыы үлэтин күүһүрдүөхтэрэ.