Саха тыйаатыра саҥа испиктээкили сүрэхтиэ

Саха тыйаатарын артыыстара саҥа испиктээкилгэ бэлэмнэнэллэр. Саҥа туруоруу Валентин Распутин айымньытыгар олоҕурун, 60-с сылларга ГЭС тутуллуутун түмүгэр уу аннытыгар барбыт Матера дэриэбинэ туһунан буолар.

Андрей Борисов, режиссёр: "Билиҥҥи бириэмэ сыаннастарыгар олус диэн сыһыаннаах роман. Аан бастаан 1989 сыллаахха туруора сылдьыбытым, билигин өссө күүһүрэн таҕыста быһылаах. Тоҕо диэтэр ити тема өссө күүһүрдэ".

Бу испиктээкилгэ режиссер Андрей Саввич историяны, норуот үгэһин, култууратын,  төрөөбүт дойдуга тапталы, айылҕаҕа харыстабыллаахтык сыһыаннаһыыны көрдөрөр. 

Андрей Борисов, режиссёр: "Хас биирдии уобарас билииҥҥи олоххо баар дьоннор. Онон көрөөччү биһигини кытта, бу билиҥҥи олоххо баар кыһылаҕалары уонна ону хайдах төлөрүтүөххэ сөбүн кэлэн көрүҥ".

Саҥа туруорууга 1974 сыллаахха бүтэрбит Щепкин аатынан театральнай училища бастыҥ артыыстара оонньуохтара. Саха өрөспүүбүлүкэтин култууратын үтүөлээх үлэһитэ Зоя Попова сүрүн оруолга оонньуур.

Зоя Попова, СӨ култууратын үтүөлээх үлэһитэ: "Бу тема ааспыт да кэми, билиҥҥи да кэми, кэлэр да кэми барытын хабар дии саныыбын. Тоҕо диэтэххэ Матера темата биһиэхэ Туой Хайаҕа баар дии.  Онон магыннаһаллар".

Испиктээкил олунньу 21,22,23 күннэригэр Саха тыйаатырын улахан сценатыгар туруоҕа. Ол кэннэ артыыстар үгэс быһыыытан сааскы гастролга айанныахтара. 

"Саха тыйаатырын артыыстара быйылгы гастролларыгар көрөөччүлэригэр анаан улахан испиктээкиллэри бэлэмнээтилэр. Ол курдук “Хара кыталык”, “Андаҕар” уо.д.а туруоруулар. Бастакы улууһунан Үөһээ Бүлүү буолуоҕа".

Быйыл артыыстар Бүлүү эҥээргэ айанныахтара. Ол курдук Үөһээ Бүлүү, Бүлүү, Сунтаар, Ньуурба, Ленскэй уонна Мииринэй улуустарыгар тиийиэхтэрэ. Номнуо хомунуу, бэлэмнэнии үлэтэ саҕаламмыт, буоларын курдук гастролга тыйаатыр барыта барар.

Айаал Аммосов, СӨ култууратын үтүөлээх үлэһитэ: "Сырыы аайы уларытан сылдьа сатыыбыт. Холобур,былырыын хоту өттүгэр сылдьыбыппыт. Оттон быйыл Бүлүү бөлөхтүнэн. Улуус кииннэригэр улахан испиктээкиллэри көрдөрөбүт. Оннук луустары наардаан, ханныкка сайаапка түһэринэн Саха сирин барытын хаба сатыыбыт. Көрөөччүлэр кэтэһэллэр аҕай".

Сааскы гастрол олунньу 24 күнүттэн саҕаланыаҕа. Үгэс быһыытынан артыыстар гастрол кэмигэр олохтоохтору кытта көрсүһэллэр, маастар-кылаастары тэрийэн ыыталлар.