Саамай сылаас тохсунньу

Сааскылыы ылааҥы күн-дьыл туран оҕо аймах таһырдьаттан киирбэт. Уулуссалар, болуоссаттар тобус толорулар. Сыл саҥатыгар  маннык балысхан сылыйыы хаһан да буола илигэ. Бүлүү бөлөххө 4, оттон Ленскэйгэ олох да 1 эрэ кыраадыс. Синоптиктар этэллэринэн быйыл тохсунньу кулун тутар ыйы батыһар. 

"Нэдиэлэ устата өрөспүүбүлүкэ үгүс улуустарыгар нуорманы таһынан сылаас күн-дьыл турар. Холобур, Дьокуускай куораты ылан көрөр эбит буоллахха, тохсунньу 23 күнүгэр -7 эрэ кыраадыс. Бу муҥутуур көрдөрүүнү лаппа куоһарар. Оттон саамай сылаас тохсунньу 1979 сыллаахха буола сылдьыбыт эбит", - Мария Дмитриева, корреспондент.

Саха сиригэр климат чинчийиллэр буолбута биир үйэ буолла. Бу сыллар тухары маннык сылаас кыһын 1-2 эрэ бэлиэтэнэ сылдьыбыт. Оттон бу сырыыга атлантическай циклон кэлэн ичигэс халлааны аҕалла диэн халлаан туругун кэтээччилэр этэллэр.

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта:"Саха сирин куораттарыгар Ленскэйгэ, Мииринэйгэ, Өлүөхүмэҕэ, Бүлүүгэ уонна Дьокуускайга бу кэмҥэ саамай үрдүк температура бэлиэтэннэ. Ити иннинэ бу күҥҥэ 1932 сыллаахха -18,6 буолбут".

Онон быйыл үйэҕэ буолбатах сылаас кыһын буолла диэххэ сөп. Сэтинньи уонна ахсынньы ыйдар эмиэ нуорманы таһынан ичигэс этилэр. Тумана суох кыһын буолан бары олус диэн үөрэбит, ол эрээри Саха сиригэр тымныы тыын суолталаах. Дьиэлэрбит, суолларбыт тымныыга тирэхтэнэн тураллар.

Александр Жирков, Ирбэт тоҥу чинчийэр институт криолитозона  лабораториятын сэбиэдиссэйэ: "Климат уларыйбытын, сылыйбытын көрөбүт бүтэһик сылларга. Ол курдук сирбит ньуура алдьанара элбээн иһэр. Ордук муус ардьайдаах сирдэргэ ону көрөбүт. Өлүөнэ Амма тардыыларынан Мэҥэ Хаҥалас, Амма, Уус Алдан, Чурапчы, Таатта оройуоннарыгар. Бүлүү да эҥээр сирдэргэ оннук сирдэр бааллар. Ол сирдэргэ ордук күүскэ дьайыан сөп".

Оттон күн - дьыл туруга кэлэр нэдиэлэттэн ситиһэн тымныйыа диэн күнү дьылы кэтээн көрөөччүлэр сылыктыыллар.