Нам улууһун Модут нэһилиэгэр саҥа оскуола арылынна

Саҥа сылы көрсө Модут нэһилиэгэр өр кэтэһиилээх 150 миэстэлээх саҥа үөрэх кыһата арыллынна. Саҥа оскуола икки мэндиэмэннээх, 2,5 тыһыынчаттан тахса кв.м. иэннээх, оҕо үөрэнэригэр туох баар усулуобуйа барыта тэриллибит.

Үүнэр көлүөнэ сайдыытыгар, иитии-үөрэтии саҥа эйгэтин тэрийиигэ толору кыах биэрэр саҥа оскуола олоххо киирбититтэн  олохтоохтор, учууталлар, ордук оҕолор үөрүүлэрэ муҥура суох.

Вячеслав Герасимов, Модут орто оскуолатын 9-ус кылааһын үөрэнээччитэ: «Саамай сөбүлүүр кылааһым – черчение киэнэ буолбута. Киэҥ, сырдык. Тренажернай саала баар, спорт саалата. Үчүгэйдик дьарыктанарга, экзамен туттарарга усулуобуйа барыта баар».

Модут оскуолата агро хайысхалаах үөрэх кыһата буолар. Бу хайысханан үлэлээбитэ 25 сылыгар барда.  Саха сирин бастыҥ агрооскуолаларын иһигэр киирэр.

Туйаара Естафева, Модут орто ооскуолатын дириэктэрин оҕону иитии үлэтигэр солбуйааччы: «Оскуолатааҕы бизнес-инкубатор үлэлиир 2019 сылтан. Ол чэрчитинэн араас ярмаркаларга кыттамыт 2022 сыллаахха “Лучшая агрошкола” аатын сүгэн олоробут. 2024 сылга “Лучшее фермерское хозяйство-предприятие” диэни улууска ылан турабыт».

70-с сыллардаахха тутуллубут оскуола 2022 сыллаахха хаарбаҕынан биллэриллэн, оҕолор үс сиринэн көһөн үөрэммиттэрэ. Саҥа таас оскуола икки сыл иһигэр тутуллан үлэҕэ киирдэ. Үлэни саҕаланыаҕыттан бүтүөр диэри олохтоох тутуу тэрилтэтэ сүрүннээтэ.

Юрий Слепцов, Нам улууһун баһылыга: «Олохтоох дьон баҕа санаата. Хамаанда үлэтэ элбэҕи кыайар диэн көрдөрөр».

Оҕо билиҥҥи кэмнэ киэҥ билиилээх, бары өттүнэн сайдыылаах буоларын ситиһэргэ сөптөөх усулуобуйаны тэрийиини, киэн билиилээх ыччат дьону иитэн таһаарарга Өрөспүүбүлүкэ салалтата инники күөҥҥэ тутар.

Айсен Николаев, Ил Дархан: «Бэрэссидьиэммит Владимир Владимирович Путин “Үөрэҕирии” нацбырайыагар киллэрэммит, онтон үбүлээһини ыламмыт Өрөспүүбүлүкэбит үбү-харчыны көрөн, элбэх кэнники сылларга улуустарын даҕаны, Өрөспүүбүлүкэни даҕаны аатырдар, биллэрэр дьоннору иитэн таһаарыахтара диэн эрэнэбин».

Сылын аайы Өрөспүүбүлүкэҕэ саҥа оскуолалар, оҕо уһуйаанын эбийиэктэрэ тутуллан үлэҕэ киирэ тураллар. Былырыын 15 үөрэх кыһата тутуллан үлэҕэ киирбитэ. Манан үлэ тохтообот.